卻說11月初時，日本警方拒捕咗五名涉嫌於過去10年舉行多場「亂交派對」、賺取至少6.5億日元 (約3700萬港元) 嘅男女。而日本《週刊文春》今日就刊出亂交派對嘅詳情，當中有參加費僅500Yen嘅「破格會」，亦有參加費高達20萬日元嘅「AV女優會」。而據其中一名被強逼參加嘅女性透露，佢曾經試過一日內與50-60名男士發生關係，甚至發住40度高燒都要繼續出席「派對」。

據《文春》報導，此次被捕嘅「派對搞手」，以現年32歲嘅沢村雅也為首，而其42歲女友小山麻代容則為組織嘅二號人物。《文春》引述知情人士指，沢村雅也乃係此界別中「首屈一指」嘅人物，其派對規模比起以往曾經被曝光嘅同類事件都仲要大。據知沢村雅也會於Twitter、日本當地嘅同好者社交媒體、交友App等招募參加者，參加者年齡主要為30-50歲，第一次參加費為25,000日元，第二次之後就會變成15,000日元。

而據一名「常客」表示，沢村雅也會於東京新宿、池袋、淺草、麻布十番、赤坂等地區中尋找可以舉行派出對嘅民宅或商務酒店，並約參加者於附近集合，收齊錢先將佢哋帶去現場。進入房間後所有參加者就只能穿著內褲，而且唔可以於場內使用手機。每一場派對大概會有20-60名男士參加，當中曾經出現過外國人；而女性參加者就大約有5人，佢哋會分處不同房間，場內甚至會有「中出專用房」。而男性們就會手持安全套及毛巾，於派對時間內 (通常為下午5點到凌晨2點) 期間，可以場內任何女性、不限次數地做愛。但「常客」亦提到，參加嘅女性大多係用錢請返黎嘅，與宣傳中「可以與女性交換聯絡帶回家」相距甚遠。

沢村雅也及小山麻代容

知情人士亦指出，沢村雅也嘅組織特色，就係會舉行不同特別派對。例如「破格會」就係以500日元參加費為賣點，但到場就會發現女性參加者只係一名40歲、相貌兇惡嘅女性；場內亦會有其他女性，但就要加錢先可以與其發生關係。而隨住活動吸引到嘅參加者變少，沢村雅也就會提出新嘅活動，例如相當顧名思義嘅「生中會」；又或者搵黎「拍攝網上AV的同人模特兒」、參加者可以將過程拍攝落黎嘅「同人攝影會」。去年四月時佢哋仲曾經舉行過「AV女優會」，當日嘅參加費高達20萬日元，但依然吸引到40名男士參加，亦即一日之內賺咗800萬日元 (約46萬港元)，而女優收到嘅酬勞僅為150萬日元 (約8.5萬港元)。所以據推算，沢村雅也等人實際賺取嘅錢，一定比起被捕時報導嘅「10年6.5億日元」更多。

同時《文春》亦訪問到一名曾經被沢村雅也等人強逼參加派對嘅女性「F子」。據F子指出，佢當時因為離家出走而於東京遊蕩，及後被組織以每個月15-20萬日元嘅報酬吸引而開始參加派對。佢每個星期要參加3至4次派對，每次都要「由下午5點到凌晨兩點一直做愛」。知情人士指F子一日可能要與60名男士做愛，甚至曾經確診、發燒到40度都要繼續參加。而參加派對亦成為F子生活中最高優先嘅事，據知F子曾經提出想去迪士尼，但就被組織以「當日有派對」為由阻止；如果其他女參加者因事未能出席，F子亦要擔任替補，甚至曾經「遠征」那須塩原嘅溫泉。而當初承諾嘅「每個月15-20萬日元」報酬，亦被沢村雅也等人以各種原因刻扣，最終F子每個月嘅生活費只有2-3萬日元，組織二號人物小山麻代容更曾向F子說道：「冇錢你咪去做企街囉！」最後F子於去年夏天逃離組織。

資料來源：週刊文春