近來港、台娛樂圈都有一連串嘅「出軌」、「metoo」事件，唔少網民一面食花生之餘，亦對於有頭有面嘅藝人、名人竟然會做出如此「低莊」嘅行為感到驚訝。但其實「名人性犯罪」並非某個國家獨有，例如美國前總統特朗普目前亦身陷性侵醜聞、女Rapper「Lizzo」日前亦被控性騷擾自己嘅舞者。咁點解名人們似乎特別容易涉入性犯罪 (性騷擾、性侵或嫖妓) 中呢？有研究團體就表示同「性挫折理論 (Sexaul Frustration)」相關，並發現有出軌紀錄嘅名人，更容易涉入性犯罪當中。

來自美國Alabama大學嘅犯罪學教授Adam Lankford及其團隊，早前就進行一個資料收集研究，試圖證實名人嘅出軌行為，與性犯罪行為之間嘅關係。佢哋先透過「YouGov」嘅資料，選出美國本土最出名嘅200位名人 (126名男性、74名女性)，並收集與每位名人有關嘅報導、書籍、第一手資料及公開資訊，以搵出名人們出軌、性騷擾、性侵或嫖妓嘅證據。再按「保守 (只計算強力證據)」及「進取 (計算所有證據)」準則，推算名人是否有出軌或性犯罪。

結果就發現，大約有34-53%名人曾經出軌，而24-31%名人就曾經牽涉至少一種性犯罪。其中男性名人出軌及性犯罪嘅機率，比女性名人分別高2-3倍及4-6倍。而名人們出軌及嫖妓嘅機率，亦比一般美國民眾高得多。所以結論就係有出軌前科嘅名人，其性犯罪機率比起冇出軌前科嘅名人高得多。

團體認為，結論能夠用「性挫折理論」去解釋。所謂「性挫折」即係「對性行為的渴望程度，和實現程度的差異造成的挫折感」，而差異可以來自生理、心理、社會、經濟、感情、宗教等多個因素，簡單黎講就即係「慾求不滿」。理論指出男性可能因為外界及自身嘅過高期望、更強嘅性慾、對於休閒性行為嘅睇法等多個原因，導致慾望與現實嘅差異加大，換言之挫折亦更大，繼而衍生出易怒、暴力等行為。

資料來源：Celebrity Infidelity and Sex Crimes: An Empirical Investigation of Cheating, Sexual Harassment, Sexual Assault, and Solicitation