8月15日，對大部份人黎講就係一個要返工嘅星期二、進入鬼月之前嘅一日。但歷史迷或者會知道，今年8月15日同樣係法國皇帝拿破崙嘅254歲冥壽。而即將於11月上映、由Ridley Scott執導、Joaquin Phoenix主演嘅《Napoleon》，亦選擇喺今日推出新一輪宣傳。除咗有新劇照之外，Ridley Scott亦接受美國電影雜誌《EMPIRE》嘅訪問，並討論到一個頗為冷門嘅主題：拿破崙嘅痔瘡問題。

最新港版海報

話說Ridley Scott接受最新一期《EMPIRE》雜誌訪問，講述《Napoleon》嘅拍攝及籌備過程。而當記者問到電影中嘅大型戰爭場面時，Ridley Scott就出奇不意地提到拿破崙生涯後期其實有嚴重嘅痔瘡問題：「佢成日騎馬架嘛，所以其實佢有生痔瘡。痔瘡係突起嘅血管係咪？我就冇嘅，但我知生痔瘡非常非常痛，好似個Pat Pat有牙痛咁，而且你咩都做唔到。」

點解會提起痔瘡呢？原來Ridley Scott曾經想喺電影中加入相關嘅情節。「我哋覺得，如果滑鐵盧戰役 (拿破崙被聯軍打敗) 當日佢唔係被痔瘡困擾，個結局可能會唔同。嗱，試諗下佢喺滑鐵盧，坐喺個馬桶上面，出面落大雨，佢搞掂起身，望入個桶到，然後見到有血，之後佢就走出去打仗，又流汗又痛又盛。David (編劇David Scarpa) 問，咁樣拍唔會太唔光彩咩？我答，或者啦，但事實黎架嘛！」

但因為會怕觀眾們分心，所以痔瘡相關嘅劇情並無被放入正片。

而從最新發佈嘅劇照中，亦可以見到多場大型戰爭場面。當中包括預告都曾經見過，來自奧斯特里茲戰役 (Battle of Austerlitz) 嘅冰湖戰爭、以及應該係進軍埃及時嘅炮擊埸面。另外亦有多張Joaquin Phoenix飾演嘅拿破崙騎馬持刀嘅英姿，以及佢加冕Vanessa Kirby飾演嘅Josephine成為法國皇后嘅埸面。

資料來源：EMPIRE、Sony Pictures