你估人類登陸月球先，定呢個世界出現電子跳字腕錶先？雖然後者睇落容易得多，但前者發生於1969年7月，後者要等多一年，到1970年5月先由Hamilton於紐約公佈。食正當年的太空熱，腕錶以定時發出幅射脈衝嘅中子星 (Pulsar) 命名，再加上當年黎講充滿科幻感的18K金光滑錶身配紅字顯示，以及「Solid State Wrist Computer (固態腕上電腦)」為宣傳標語，是為「P1」，限量400隻，售價為2100美金——1970年的2100美金，等於今日10萬港紙左右——就連「貓王」Elvis Presley 都戴，加上1973年的「P2」，從此開拓跳字錶市場。

50年後的今日，人類自阿波羅計劃後未曾踏足其他星球，跳字錶亦已經唔係咩高科技，Hamilton卻再次推出Pulsar的後繼型號。Hamilton PSR外型上更似圓潤寬闊的P2，尺寸為40.8mm X 34.7mm，錶面右下角的「Pulsar」字樣亦換成「HAMILTON」(因為Pulsar個名賣咗比Seiko)。最大的分別則在於時間顯示，驟眼睇都係紅色跳字，但實際上用上LCD及OLED混合顯示，前者確保日光之下亦能輕易閱讀時間，按下按鈕則由OLED顯示出以紅點組成的時間。外型上除咗跟足原著嘅金色(黃金PVD塗層精鋼，售價HK$8150))，亦有較為低調嘅精鋼 (售價HK$6100)。