做得鐘錶編輯，呢個時段總會收到好多資料，sell你母親節應該送咩錶。不過，老土啲講，一年365日，你無得理得嗰日做孝子，所以送禮嘅嘢，隨心就好。但如果你肯用30幾萬送錶的話，Harry Winston Premier Precious Weaving Automatic，又係一個唔錯嘅選擇喎。

相信你唔會奢望老媽子識上鏈、睇動力儲存、轉時區、玩雙重計時或者睇月相，所以送錶，都係夠閃，夠威，function簡單就得。呢隻36mm自動腕錶有4個錶款，同樣採用日本古老螺鈿技術製作。以前螺鈿技術應用於木器、漆器上面鑲嵌貝殼，而家演變成手錶錶盤，仍然典雅。今次Harry Winston用咗金線、天然銀色珍珠母貝薄片互相交疊，營造出瑩光流轉嘅獨特編織效果，真係幾靚嘅。

4款錶，兩款用咗玫瑰金、另外兩款係白金，錶款度有57粒圓形明亮式切工鑽石，錶帶針扣另外有17粒，總重2.47卡。HW2008自動上鏈機芯，透過藍寶石水晶底蓋可以睇到。每限量30隻。

第1款玫瑰金錶殼，飾有日本皇室家徽 — 菊花，擁有延年益壽、珍貴地位嘅含義。錶盤上面，菊花嘅珍珠母貝花瓣深淺相間，同絲線細密交織，締造出精緻細膩嘅裝飾圖案，其天然虹彩光澤會隨住光線不斷變幻。

第2款搭配白金錶殼，珍珠母貝、絲線、金葉編織而成嘅抽象圖案，散發出嚟嘅微妙光澤，高貴而典雅。

第3款腕玫瑰金錶殼，玩傳統錦鯉圖案，再以絲縷、金線、珍珠母貝薄片縫織金色魚鱗，戴喺手腕活靈活現。

第4款白金錶殼，繼續玩魚鱗圖案，不過用色就較為深沉、主要見到綠光珍珠母貝。