大家細過嗰陣實有比阿媽恐嚇過「再唔聽話就搵警察叔叔捉走你！」，我嗰時仲懶係醒咁諗「警察叔叔係維持治妻架嘛！鬼會鬼閒黎管你聽唔聽話咩！」點知到依家我先知佢真係會管，不過就唔係要你聽媽媽話咁簡單嚕。

好，講返正題。今次就同大家數下喺外國發生嘅十大報警撚。所謂「報警撚」就即係啲事無大小都以為報警就可以解決問題嘅蠢人。唔信呢個世界有人咁蠢？睇下囉！

10. 

個仔唔執房，你可以選擇鬧佢、氹佢、威逼利誘佢，但你有冇諗過報警？喺2009嘅美國就有個老豆(Andrew Mizsak)因為個仔(Andrew Mizsak Jr.)唔肯執房而報警，令到件事更值得討論嘅，個仔當時已經28歲，仲係貝德福特郡的教育部官員。事後仲因為呢件醜聞而被解除兩項公職添。

9.

香港嘅麥當當因為「福喜事件」而暫停售賣麥樂雞個幾月，到早幾日先再發售，冇得食麥樂雞有冇令你嬲到想報警？喺2009年，美國人Latreasa Goodman就因為光顧的麥當勞冇哂麥樂雞賣而報警。另一邊廂就有個女人因為Burger King比錯左個包佢，同樣報警處理。喂咁講法，香港麥當勞啲包成日都整到鬼咁核突，我係咪都應該報警呢？

8.

早排《蘋果》公佈左香港十大吸引異性職業排行榜，女揀男方面警察十大不入，但2006年有位美國女人Lorna Dudash為左見多次個警察，決定報警，最後因為浪費警力被人拉左。話說呢位被Lorna稱為「有史以來最靚仔」的警察與其拍檔，曾經到訪Lorna屋企叫佢調低音樂聲浪，點知就係呢一面之緣迷到左當年已經45歲的Lorna，心亂如麻又苦無見面對策嘅Lorna於是就諗到「報警」呢一招，希望警方會再派呢位靚警察黎……呀，講講下咁似揭尾故嘅呢？

7.

2010年冬天英國陷於嚴寒與暴雪之中，警察報案中心處理緊過千個緊急求助嘅同時，有個女人報警指佢有重要財物失竊－－佢親手造的雪人一個。而令到呢個女人咁緊張嘅原因，係因為佢用左兩個一英鎊大銀同兩支茶匙黎做個雪人的眼同手。咁夾埋都可能有幾廿蚊港紙嘅！

6.

轉眼黎到盛夏的美國佛羅里達，有位不知名女士報警指佢被困車中。「我不能開動我的車，所有電子組件都壞掉了。車內變得越黎越熱，我很不舒服。」

最後警方建議佢用人手拉起個車鎖開門離去，而佢亦成功逃出……嘩驚險到呢！

5. 

年紀漸長，身邊啲朋友開始談婚論嫁。若然你係女人，但係男朋友又死都肯同你求婚，你又可以點做？一哭二鬧三上吊再拮穿啲安全套？2009年有位華裔女士Hee Orama就因為男朋友唔肯同佢結婚而報警，唔止一次半次，係四次，而且係每隔幾分鐘一次，結果又比人拉左。即係咁，如果你報埋警條仔都係唔肯同你結，咁你都知咩事啦下話，又何苦攞假黎丟呢？

4.

呢個大家應該都有聽過，一個4歲嘅小朋友因為唔識做數學功課所以打電話問警察叔叔，直到媽媽出現Cut左佢線。天真無邪嘅小朋友真係得意嘅啫！

3. 

大家可能都有試過唔記得鎖機就放左部電話落褲袋，結果佢呢到Hi下嗰到碰下就打左電話出去，為左避免呢啲咁老尷嘅笑話，大家真係記住要鎖機－－尤其當你係個毒販。喺2013年美國俄勒岡洲就有個毒販，喺進行毒品交易時唔小心Hi到個電話，結果打左去911(美國報案熱線)，仲比警方聽到哂整個文易過程。最後警方透過GPS追縱到佢嘅位置再拘捕左佢。

2. 

若然你喺一個天朗氣清的晚上，抬頭突然見到個又圓又大的發光球體，你會唔會以為係UFO？2008年有個威爾斯人就正正因為咁而報警。警方接報到場之後發現，嗰個所謂的UFO，有個大家都比較熟悉的名字，「月亮」。

1. 

有位英國女士一覺訓醒發現眼前一片漆黑，以為自己被人矇眼綁架，所以報警求助。警方到場發現佢只不過係被自己張被衾住左個頭……訓懵＿左你呀！？