有同係大叔控嘅網民就列舉咗一系列大叔嘅魅力之處，雖然有啲Point係因人而異，不過基本上都講得過嘅。

會想成家立室
正所謂「給女孩一個家，就是嫁」，雖然聽落好似好傻好天真，但唔少女仔嘅夢想就係同喜歡嘅人結婚，然後生小朋友，組織美好家庭。但對年輕小伙子而言，結婚實在太大壓力，一來自己未玩夠、二來有未有經濟能力，有幾多男人真係肯先嗰廿歲人就同另一半談婚論嫁？唔係冇嘅，不過相對三十歲而上嘅男人又確係少啲。反而到你有返咁上下年紀，玩又玩過，經濟同事業又穩定，就真係可以定個心落黎諗結婚喇。

較少拈花惹草
嗱嗱嗱！係咪真係咁就有待商榷喇，個人認為花唔花心基本上就睇人而唔係睇年紀嘅，但提出呢個論點嘅多數都認為，後生仔咩都未試夠未玩夠，自然會較易心郁郁容易有外遇；至於叔叔，要玩嘅後生時都玩過晒，咩野未試過丫，到年紀大咗，都看破塵世，知道邊一個係可以陪自己行落去嘅另一半，自然唔會咁易受到誘惑，出軌機會大大降低。

較多人生歷練
活多你十年就真係識多你十年嘢，冇得呃人，就好似人大咗，睇返小學雞中學雞為小小事同同學反面咁，你都會覺得好可笑，因為人大咗，你明白人與人之間交往係咩回事，同樣道理，叔叔比年青人老多十幾年，基本上都唔係白活，喺待人處事、社會歷練各方面，照道理應該會更為可靠。當然，唔排除有啲人一直都冇帶個腦去生存啦下。

冇咁衝動
成日話年青人血氣方剛，咩都易衝動，郁啲就同人打交同人嘈，做好多嘢都唔經大腦。但係大叔就少好多呢種情況，人又成熟好多，基本上凡事都會理性思考，會諗過度過，唔似後生時咁衝動容易生事。不過……呢啲性格上嘅嘢都係因人而異啦。

性能力更好
唔好以為年青人血氣方剛喺床上都威猛啲，原來男性性能力最好嘅時期係三十歲之後，而且有一定經驗後，技巧上又好啲，仲更知女人心，同一味識衝顧自己爽嘅男孩子完全唔同。