直率得嚟顧人感受
成日聽到啲人講嘢Hurt完人之後，一句︰「我講嘢係咁直架喇！」就大晒完場。無錯，直率嘅人感覺上易相處啲，又唔會婆婆媽媽，想點就點，好似好有性格又好開朗咁，非常得人鍾意。不過同時直率嘅人都會太忠於自己，唔太識得顧及他人感受，佢可以好直接話你知佢好愛你，但同時可以好直接話你知你好難頂，咁唔識睇女朋友眉頭眼額嘅男朋友，女人們又受唔受到先？

口甜舌滑得嚟有安全感
係人都鍾意畀人讚，聽到對方成日對自己講Sweet到爆嘅說話當然開心，但要知道好多時咁識氹人嘅男仔同時都好識氹其他女仔，就算佢唔係有心氹其他女仔，慣性讚美別人嘅佢，都特別容易吸引到異性。又要Sweet又要有安全感？睇劇實有架。

大男人得嚟聽教聽話
人係自私嘅，作為女人，梗係想有人照顧自己、保護自己，幫自己安排晒一切唔使煩，搵個大男人照住一世實冇死，但大男人同時又會有較強控制欲，如果想對方照顧晒自己，但又調轉頭想對方聽晒自己話，可以任擺龍門任調教，真係諗都唔好諗。

浪漫得嚟贛直
好多女仔都覺得贛直嘅男仔傻更更好得意，而且感覺一定會專心一意對自己，唔會出軌唔會花心，但最爆係女女同時希望呢位贛直男會做啲好L浪漫嘅事情，其實兩件事都幾背道而馳，通常就係因為仔條贛99生勾勾唔識做浪漫嘢，先畀人老實安心嘅感覺，到有一日佢識好多冧女方法，就應該要留意佢係咪已經升級變咗做偽毒。