得架嘞，唔使解釋啦！呢個咁嘅標題你都照入黎睇，你嘅夢想就做九把刀，有個拍咗九年拖嘅正印，再去搵個年輕貌美嘅小三，被記者影到，出黎道歉都仲講緊自己有幾愛個小三，然後個正印都仲會原諒佢。武斷啲黎講，你一係就依家有出軌，一係一路都想出軌但係又唔夠膽，所以黎睇定先。

明嘅，齊人之福我哋其實都好想享！雖然正常黎講唔會有記者黎影你，但面對女友疑幻似真、聲東擊西嘅盤問，就需要多少警覺性同經驗。以下就同你講解一下五個你以為冇事，其實含藏殺機嘅問題同正確答案。

1. 呢套戲我哋幾時睇過？

可能係指住一隻套你哋根本沒睇過的DVD，又或者是一張喺街邊的海報。背後的含意是假設你有和其他女仔偷會睇戲，就會鬼拍後尾枕自己爆響口。

如果你清楚記得究竟有冇睇過，當然就可以如實作答。但假如你印象有些少模糊的話，最安全的答法就是以平靜而帶點疑惑的語氣反問：「有睇過咩？」以進為退！

2. 在你的車/家/衣袋中找出一隻耳環之類的飾物，然後問你「邊個架？」

唔好講有小三，就連車過女性朋友返屋企嘅男人，突然面對呢條問題都可謂束手無措。就算你幾愛你女朋友，你都冇可能記得佢所有飾物，更惶論當你有唔止一個，然後要分得清究竟邊件飾物打邊個女友。所以事前功夫要做足，確保沒任何證物留低。更要小心提防是女友把自己的飾物藏起再陰你，所以記住自家女友的常備飾物都唔係壞事。

3. 「嗰日我個friend見到你喎！」

首先你要記住，香港地豆潤咁細，加上大家來來去去都係行嗰幾個地方，比人撞到係一見好平常嘅事。女仔問呢條問題就係想睇你會唔會露出馬腳，不停追問「幾時？邊度？邊個朋友？」一個簡單平實的答案：「哦？點解佢唔叫我嘅？」就係最好嘅答案。

當然，前題係你同小三冇喺街上面做出啲親密行徑，咁就算佢真係有Friend撞到你都仲會有方法打得甩。如果你好似九把刀咁兜街錫比人斷正…咁其實你都冇諗住收埋個小三呀？

4. 「呀邊個邊個因為個男朋友有小三，所以散咗！」

拋磚引玉也。如果你喺呢個時候表現出對嗰個男性嘅同情，甚至講個女仔嘅壞話，你女朋友就會覺得你都有出軌(唔好問個邏輯關係喺邊到黎啦，如果邏輯搞得掂我哋就唔使咁煩啦係咪？) 。

所以你可以做兩個反應，第一可以嘗試加入討伐個男仔嘅行列，以示你不屑呢種行為，但切忌演技過火，建議睇返兩本史坦尼斯拉夫斯基先好用呢招。第二個方法就是發揮男士的理性基因，深入淺出咁討論二人分手的原因，重點是最後得出的結論一定要是「其實小三只係導火線，兩個人有其他問題。」

5. 「我睇過你部電話……」

有睇過片都知呢句說話威力有幾咁大。但所謂防範於未燃，電話Set Password、Delete對話紀錄是常識吧？而且除咗電話，大家都要小心電腦。我就曾經聽過有女仔會襯男友完事之後去沖涼的空檔，開佢個FB將佢幾年前的聊天紀錄都刮埋出黎睇，係咪好恐怖呢！

所以面對呢個問題都係要冷靜，就算你的電話唔「乾淨」也不要即刻彈起身。可以選擇扮冇嘢繼續瞓覺，又或者反將她一軍：「咁你搵到啲咩呀？」咁就算之後有場「大戰」都不至於處於被動捱打的位置！

結論：

其實睇到咁煩，你就知其實齊人之福真係唔易享。所以本文青都唔支持大家有小三－唔係道德上唔可以，而係個成本效益好差嘛！