日本Calbee經常都會推出不同口味嘅新零食，但今次呢款「納豆薯片」真係估佢唔到，連見慣奇怪嘢嘅日本網民都感到大為震驚！

Calbee最新推出嘅「ポテトチップス 納豆好きのための納豆味（薯片　為喜歡納豆的人設計的納豆味）」喺日本全國LAWSON便利店限定兼限量發售，好多人都好奇究竟「納豆薯片」會係咩味道同質感，有網民就率先為大家試一試龍與鳳！

「納豆薯片」基本上分開薯片同納豆粉兩個部分，就咁食薯片，聽聞就係有少少黃芥末嘅醬油口味，正正常常，唔算特別，口感都係正路薯片嘅鬆脆感覺。

而「納豆薯片」嘅精髓就在於佢包納豆粉，好似SHAKE SHAKE薯條咁，只要將包納豆粉倒入薯片袋入面，再SHAKE一SHAKE，令薯片都沾滿納豆粉就OK，據講加咗納豆粉嘅薯片會明顯出現好似納豆一樣嘅黏稠口感，仲會多咗陣納豆味添……