咸爺琴日旋風式襲港，唔去中環、銅鑼灣尖沙咀等名店與自由行林立的旅遊熱點，反而出現在本港市民好日都未必會去嘅沙塵滾滾荔枝角工廠區，於是呢個有如穿越蟲洞再進入五維世界的超現實景象洗咗你成個FB版，之後咸爺就靜悄悄地消失於眾人眼前，幾有型！

有睇新聞都知，咸爺今次來港唔係為咗出席咩公開場合，而是為咗自家品牌而奔走。一係為咗 宣傳自家威士忌品牌HAIG CLUB，一係為咗與利豐商討推出休 閒運動服裝系列的計劃，反正就係黎「講數」。我哋呢啲唐人一諗起講數，腦海出現的一定會係兩個彪形紋身大漢開返圍檯，一個晾腳，一個撩牙，背後分站幾十個 打手，桌上面放滿杯杯碟碟隨時準備用作飛行道具使用，大家你有你講，我有我講兩個鐘之後握個手就叫傾完，即使場境換成中環寫字樓，講數的本質都是一樣(如 果你仲記得當日學聯同政府嘅會面的話)。但鬼佬傾生意就寧舍唔同，咸爺同利豐單生意，由荔枝角地面就開始傾。

即係咁，作為恆指成份股，在本港屹立將近70年的上市公司，如果你話利豐冇辦法將咸爺隱秘地運入Office呢，你就係侮辱緊自己嘅智慧。係囉喎，好地地咸爺會喺光天化日、眾目睽睽之下著住成套老西出現係荔枝角地面，施施然行入利豐旗下嘅OK買嘢飲，再用自己對腳行入利豐個Office啦喎！明眼人一睇就知咁做係比面利豐CEO塈李玟老公兼咸爺老友Bruce Rockowitz啦！做咁大場戲，都係幫利豐做Brand Building啫！

換個角度睇，咸爺同利豐有此一著，係對香港抱有幾大期望！首先咸爺夠膽喺單單一個疑似保鑣的陪同下就行出街，是對香港治安的信心，而有好多喺香港生活咗幾廿年的達官貴人到依家都冇呢份勇氣。第二，喺冇任何事先張揚之下，整場戲的成效就取決於香港人傳播突發訊息的速度同反應有多高，其中的核心就即係葉劉所講「外國勢力」的其中一環－「社交網絡」。

事實上證明咸爺加FB呢兩個外國勢力合作真係搞到香港立立亂！成個FB都充住各個角度嘅咸爺，喺呢個初冬微寒之際勾引著每位春心蕩漾嘅少女(男)之心，真係邊有心機做嘢。利豐就更加係大贏家，「利豐」、「OK」、「荔枝角」恐怕就成為當日網絡熱門字眼之一。以一個FB專頁的廣告費由幾千到幾萬銀不等，利豐起碼慳返一百幾廿萬自我宣傳費，比起地鐵要在每個地鐵站都貼滿為自己歌功頌德的飛機文，真係既方便又快捷！咸爺到訪過的OK就更應該立即列為一級保護文物，免受地產霸權侵占！

講咗咁耐，究竟咸爺訪到我哋呢啲凡人有咩啟示？又或者我問你，除咗呢單嘢，你最記得近期關於碧咸嘅係咩呀？球迷們可能會話係咸爺大仔Brooklyn加盟阿記，時裝友可能會話係咸爺二仔Romeo出演Burberry廣告，其他人就好有可能記得在FB流傳，有如女人月經一樣每幾個禮拜又出現一次的，名為「碧咸與霆鋒的分別」的文章……