日本薯片製造始祖「湖池屋」係日本歷史悠久嘅人氣零食品牌，早前MenClub喺Facebook同大家分享咗佢嘅金箔薯片，見到每塊薯片都沾滿閃令令嘅金箔，雖然味道同一般原味薯片分別唔大，但賣相絕對吸引，用嚟呃Like一流！不過市面上有形形色色嘅薯片，試得太多重口味，大家又會唔會想返璞歸真，食吓純天然薯仔味連鹽都冇粒嘅薯片先？有消費者就向「湖池屋」提出呢個要求，於是市上最Pure最True嘅薯片就正式登場，就係「湖池屋」嘅「素顏薯片」（ポテトの素顔）！

「素顏薯片」係將薯仔切片，再用植物油炸，炸完之後完全唔再額外調味，可以直接呈現薯仔最天然嘅風味，就好似冇化妝嘅少女一樣咁清新動人。如果消費者都係覺得太淡口唔夠喉，仲可以自己調出最喜歡嘅口味，多鹽又得少鹽又得，「素顏薯片」絕對可以配合得天衣無縫！