即使係雄糾糾嘅巴打，相信遇到可愛嘅貓貓都會瞬間變成貓奴，但奈何唔係人人都有福得到皇上寵幸，有啲人就算用盡方法，出晒逗貓棒同食物，一樣得唔到皇上歡心，如果你都同樣擁有「不被貓貓寵幸」嘅潛質，咁似乎你非常需要呢款日本推出嘅「受貓歡迎的入浴劑」！

由於太多人想得到貓貓寵幸但又受到冷漠對待，於是日本市面上就出咗呢款受貓歡迎嘅入浴劑「NEKOMOTE BATH POWDER」，你只需要用佢浸浴，自然就會令貓貓為你為之瘋狂。

呢款聲稱浸完會受貓歡迎嘅入浴劑「NEKOMOTE BATH POWDER」含有會令貓興奮嘅木天蓼，佢分別有玫瑰、迷迭香、德國洋甘菊三種香味，等你浸完浴後，全身留有貓貓喜歡嘅氣味，到時想唔受貓貓歡迎都幾難！