作為一個能屈能伸嘅男士，久唔久都總會做錯、講錯某啲嘢，所以返到屋企要喺算盤、Keyboard、Lego同玻璃中揀一樣黎跪。你可能會話，「男兒膝下有黃金，跪咗我仲使見人嘅？」我話你知，跪完起返身腳痺行唔到更加唔使見人。所以大家可以留意下呢個日本出嘅「正坐摺櫈」！

圖片：Rakuten

咁日本人整出黎當然就唔係畀啲老公用咁簡單，而係因為日本日常生活中，都有唔少要「正坐」嘅時候，例如大時大節去探長輩、第一次見情人家長、甚至係柔道、花道、茶道等都係需要長時間正坐。而日本市面上都有唔少類似嘅「正坐椅」，呢張PATATTO SEIZA嘅特點就係可以完全摺埋、重量只有180g，但打開可以承重100kg。講真你話咁樣坐係咪會舒服好多呢，我就有保留，但好多時大家要正坐就係因為冇得揀嘛！咁好少少都好過冇呀！

圖片：Rakuten