最近有唔少熱爆電影上畫，例如《侏羅紀世界》、《賤熊2》等等，遲啲仲有Mean娜最愛的《Minions》，真係超級期待，等唔切出碟，套套都想入戲院先睹為快！不過入戲院都唔代表可以好好享受睇電影的樂趣，如果遇到以下呢幾種人，真係好想對佢唱返首︰「唔該 行開！」

喺戲院大聲傾電話
老老實實，呢種人真係無處不在，無論邊間戲院、睇乜嘢戲，都會有呢種情形發生。Mean娜當然明白有時有急事，可能需要接聽電話，但其實真係有必要講電話的話，係咪可以出去戲院傾，而唔係一邊睇戲，一邊大大聲講，企圖蓋過電影播放的聲音呢。

喺戲院開大餐
喺戲院食爆谷小食等等當然可以接受，但有時大家就喺度食薯片食紫菜，成埸戲都係摷包裝的索索聲，其實真係幾騷擾。食零食都算喇，入戲院食快餐先最崩潰，成場都會聞到麥當當嘅味，真係唔知對方係嚟睇電影定食飯。

踢凳
相信冇人喜歡被踢凳，如果真係覺得對腳伸唔直好唔舒服，可以考慮坐走廊旁的位置，伸一伸隻腳出去。

電影開始先入嚟
雖然你買咗飛，無權要求你幾時入場，但當電影開始咗，你先入途入場，擋住N個人的視線，慢慢走向自己的位置，其實真係會令睇戲的人好掃興，特別如果個位喺中間，真係會覺得勁煩。

超級嘈又冇人理的小朋友
如果去睇動畫電影，有小朋友吵鬧係在所難免，但呢個時候大人應該負起責任，提醒小朋友要安靜睇戲，而唔係由得自己個小朋友一直嘈一直嘈，影響到其他人睇戲。