被社會認為「應該要做嘅事」所牽絆

人大咗自然冇細個咁無拘無束，好多時會受好大嘅社會壓力影響。特別到30歲關水，大家都會覺得係一個「穩定」時期，認為你「應該要成家立室」、「應該要有小朋友」、「應該要有穩定事業」等等，但其實呢啲社會標準唔可以規限你嘅人生，你唔跟大隊唔代表你失敗，因為每個人都有自己嘅步伐，只有遵從自己想行嘅路，先會活出自己嘅人生。

永遠將工作放喺第一位

好多時都話男人要以事業為重，特別到30歲左右，更加係事業嘅黃金時期，所以凡事都以事業為優先。但如果你真係咁諗，你就要好好記住，永遠將事業放第一位，將來一定會後悔。因為相比起事業，花時間心機陪你所愛嘅人其實更加重要。

覺得30歲已經好老

30歲喺大家眼中可能已經係中年，甚至你自己都會覺得自己體力精神等等不及從前，深深覺得自己已經老喇……但其實30歲正值壯年！一啲都唔老！仲係行得食得玩得瞓得同後生仔差無幾，應該要Keep住年輕心態去好好生活，唔好一味覺得自己老而放棄大好青春。

冇好好注意身體

叫你心境年輕，唔代表你仲可以一直好似以前咁去糟蹋身體，又捱夜又亂食嘢。因為身體變差唔係一朝一夕嘅事，係長久以來積落嘅結果，所以30歲嘅你，為咗將來真係老咗時嘅身體著想，更加要識諗啲，改變自己嘅壞習慣，好好愛錫身體。

唔識儲蓄投資

好多人都覺得打工儲錢唔使好多，呢個moment夠用就得。但如果冇好好嘅儲蓄同投資計劃，到想退休時就冇咁輕鬆，因為你知道手頭上嘅錢唔足夠你安穩過埋下半世。所以要記住早啲開始儲錢，學習投資，將來想幾時退休就退休。

過分在意無謂人嘅諗法

人係群體動物，成日溝通交流相處，當然會在意其他人點睇自己。但要明白，人到30歲，好多人心已經睇得清清楚楚，亦了解冇可能滿足任何人，既然有啲人從來唔會在意自己，咁自己又何必去在意佢？只需要好好花心思喺真正著緊自己嘅人身上就夠。

唔抽時間陪父母

當你30歲覺得自己比以前成長咗好多嘅時候，有冇覺得其實同時父母都老咗好多？唔少人到父母年紀老邁開始多病痛時，先後悔點解唔襯父母身體好時花多啲時間陪佢，見多幾面。

將時間浪費喺唔開心嘅事情上

人生不如意事十常八九，有啲負面嘅人和事，總會影響自己心情，但偏偏自己又好難控制唔去諗佢。要知道，時間未必可以令呢啲唔開心嘅事物消失，唯一可以改變嘅，只有自己嘅心態。與其花時間去胡思亂想鑽牛角尖，不如學習點去take it easy令自己活得更加自在。

事事以別人為先

過去可能你係一個大好人，事事以別人為先，結果自己受好多委屈，積積埋埋好多壓力，自己唔開心，身邊嘅人又唔見得有幾開心。學下改變一下自己嘅想法，將自己嘅位置放得更重要，多啲考慮自己，滿足到自己先可以將快樂帶畀人，而唔係一味散發悶悶不樂嘅負能量。

唔敢把握機會

以前成日覺得，冇左今次呢個機會，咪等下次囉。但機會呢家嘢，並唔係成日有，唔好因為自己已經30歲而變得小心謹慎，凡事唔敢試，唔敢踏出第一步，因為你唔勇敢接受新嘅機會，好可能再冇機會實現到自己嘅夢想。

唔去旅行

唔好以為環遊世界真係喺電腦click個掣就搞掂，因為親身踏足另一片土地係第二回事，唔好覺得去旅行好浪費金錢而慳慳埋埋，應該要快啲plan下去睇出面嘅世界，因為到你老咗又或者冇時間冇精力嘅時候，就想去旅行都冇得去架喇。