講返句公道話，Mean娜作為女仔，實撐做女人係辛苦架！M到又痛、生仔又痛、又要Keep住減肥扮靚呢啲終身事業……但你畀我揀，我都係會揀返要妹妹唔要丁丁。皆因喺香港做男人實在太太太太太辛苦，好似做咩都畀女人束縛住咁，舉個例「幫女人拎嘢」。老老竇竇，除非啲嘢真係十萬個重，如果唔係女人唔會真係冇力到連一小袋嘢都拎唔郁囉，呢個時候，個男人唔幫佢拎，就可能會畀人話「冇風度」，但幫佢拎呢？又可能畀其他人睇唔起，OK！假設你好Gentlemen，幫佢拎袋不特只，仲幫佢打點一切，結果係咩？可能就得到「狗公」呢個朵。
不過凡事唔係絕對嘅，前提係你要有錢或者有樣。喺香港，好多女仔只要靚一靚，識姣下仔，嫁個金龜婿就安享晚年。天生唔靚又想嫁入豪門，咪整囉，唔見得香港啲仔有幾介意喎，娛樂圈幾多例子你有眼見啦。再唔係講衰啲，真係咁鍾意錢，咪腿張開囉，反正市場有大把需求。但做男人就唔同，醜男冇錢就注定死，但靚仔冇錢一樣都死，差別在於早死定遲死啫。喺香港地，你人幾好幾乖仔，都可能畀條女嫌你窮而唔嫁你。相反，你好有錢但個人仆街，一樣大把女爭住要同你交配結婚。公平咩？！唔公平，但係事實咁解囉。不過......有錢仔都未必真係好風光，因為你永遠唔知對方愛嘅係你嘅錢定你嘅人。
當然～女人對男人造成嘅心魔又邊只咁少，只係Mean娜一時心血來潮，個Intro打長咗啫！知打咁長都冇人有心機睇架喇，我哋都係用返Point Form逐一擊破，關於女人，男人仲驚啲乜啦！
怕被嫌棄性能力
今時今日喺香港，男人對住女人好似事事都要低頭，包括房事。記得喺網上睇過篇文，講有個女仔嫌佢男友丁丁短小，做得唔爽，跟住男男女女都力撐女事主，又話「飛咗條仔啦！咁鬼弱！」、「要為自己性福著想」、「咁嘅男人咪鬼要」等等；調返轉，有個男仔嫌佢女友陰道太闊，做得唔爽，結果男男女女都圍插佢，又話︰「人渣！當條女係雞呀？！」、「仆街！愛一個人唔係淨係做愛囉！」……仲有咩說話會講？相信你都估得到。明明同一個Case只係性別唔同咗，點解反應差咁遠？因為香港就係女人大晒，喺房事上作為男人稍有不慎，咪話弟弟抬唔起頭丫，你自己對住條女都抬唔起頭啦……
怕結婚
成日話香港男人好鍾意拖住唔結婚，其實諗落都有原因嘅……對女人而言，結婚就係搵個自己鍾意嘅、有一定經濟能力嘅對象，但對男人而言，除非你話結婚可以AA制丫，如果唔係基本上搞結婚、擺酒、去蜜月、買車買樓全部都要個男人揹晒上身。如果可以結咗婚再慢慢儲錢買樓都還好，但香港地好多父母對未來女婿多多要求，明明自己個女都唔係咩新鮮蘿蔔皮，但偏偏要迎娶佢個女時(除非搞大肚)，又要阿未來女婿先有車有樓……我知，個個父母都當自己囡囡掌上明珠，但係咪一定要咁勢利呢？終身伴侶嚟講，最重要阿女鍾意，加埋人品好同有穩定事業已經夠晒啦，何必咄咄逼人搞到個男人都唔敢結婚呢？要明白，香港地搵食艱難，大部分女人都想30歲前結婚，但30歲，先係男人事業起步嘅時期，有幾多人已經有車有樓丫？咁大經濟壓力，就算幾愛個女人，自然反應都想避啦。
怕生小朋友
未必係因為個男人唔鍾意小朋友，而係因為香港地養個小朋友笨唔容易。首先，佢又要再賺多啲去養埋個細嘅，雖然話平有平養貴有貴養，但香港競爭咁大，唔將最好嘅畀晒個小朋友，容乜易佢畀其他人睇唔起，又跟唔上學校進度，跟住又難入大學，又成為大家口中嘅廢青，又畀男/女朋友嫌，又結唔到婚……
怕愛上樣衰嘅女人
有時候愛情要到嘅時候，樣貌都阻擋唔到愛情嘅來臨。如果可以嘅話，邊個唔想同俊男美女拍拖丫？但感覺嘅嘢好難話得埋，本來你對嗰位相貌平平甚至有少少樣衰嘅女仔係一般朋友，丫～相處落又幾啱傾，又幾好Feel，時間耐啲又耐啲，就畀佢嘅內在吸引，想同佢喺埋一齊。喺女人角度而言，你就當然好好仔啦，唔睇外在美，不過你班賤嘴兄弟都仲係睇外在美嘅男人，Feel呢家嘢，得你同對方知，兄弟們知條鐵咩？於是咪開口埋口笑你︰「你好Dry咩？咁嘅女都食得落？！」、「兄弟，唔好作賤自己，饑不擇食」……可能你把口話唔Care，因為你好愛你女朋友，但你話係咪完全冇精神壓力？咁就你自己先知喇。 | 