講明先，唔好以為見到加藤鷹一定係講18禁話題，呢度講嘅「真男人」堅係教你點做一個男子漢！每個人心目中都有不同嘅「真男人」人選，雖然配圖好明顯就係圖文不符，但相信以呢位擁有「神之手」嘅加藤鷹比作真男人，應該會少啲異議掛？lol～

老老竇賁，做男人係幾辛苦，特別係喺香港，明明華人社會應該係男尊女卑，偏偏香港地，班女個個做晒公主，男人好多時連奴才都不如，仲要慘到做狗奴才，認真嗚呼哀哉！唔係話女尊男卑有問題，但好地地一個懶Fair嘅地方，係都要搞到男人冇晒樽鹽就好有問題！喺呢種扭曲嘅情況下，男人更容易放大自己孩子氣嘅一面，出現種種大家口中「唔似男人」嘅表現，例如逃避、鬥氣、自誇、卸膊等等，十足小朋友嘅行為。有時當事人未必察覺，一來男性本來就係比較遲熟，內心永遠都有顆童心，有機會去到三、四十歲大男人，先慢慢醒覺，作為男人應該要點；二來世界上嘅真男人並唔多，冇一個好榜樣畀人參考，無端端又點識變做真男人呢？就好似小朋友咁，冇人教，一樣好多嘢都唔識。所以成為真男人，係需要學習。

外國網站askmen就有篇文章，教大家如何成為真真正正嘅男子漢！

學習有自信
雖然網上常常見一眾巴打高談闊論，成日係威係勢咁，但現實中好多人都係因為過於自卑，先喺網上爭取認同感，搏得大家留意。但回歸現實，對住女朋友，會成日擔心呢樣擔心嗰樣，怕女友身邊嘅男人都係狗公，女友會被搶走；怕女友愈來愈有吸引力就唔要自己……每個人都會感到不安，但如果將不安放大，就容易唔理性地呷醋、為難女朋友，令二人關係惡化。學習畀多啲信心自己，唔一定下下同人比學歷比物質比外貌，即使係小事，不論溫柔又好有耐性又好誠實又好，都可以係你嘅優點之一，值得讓你自豪。

學習坦誠地溝通
好多男人都誤以為冷酷=有型=真男人，覺得展露情緒同心事好鬼婆媽。但其實扮cool先叫man呢個想法好小朋友，真正嘅男人唔介意打開心窗，同人坦誠溝通，表露內心最真嘅一面。如果下下怕受傷害，而築起道牆與人隔絕，反而證明你係一個脆弱嘅人；同時靠花言巧語去掩飾自己內心都係，因為唔敢面對自己，因為想逃避問題同責任，而不停講大話，傷害人又傷害自己，令到你同重要嘅人都無法好好溝通。多啲聆聽別人，多啲讓別人聆聽自己；多啲向人坦白，多啲讓別人向自己坦白，走出內心嘅comfort zone，咁先係成長嘅一部分。

學習包容他人意見
每個人都有不同思想、不同意見、不同立場以及不同專長，你有你叻嘅地方，但亦有你唔擅長嘅地方。女人最怕個男人自以為自己乜都識，至威係自己，最多人聽過嘅例子應該係︰「我條仔明明唔識路，但又堅持唔問人自己搵路，結果兜咗勁耐，搞到要我去問人先知點行囉！」you see？唔好咁小學雞，真正嘅男人會承認自己嘅不足，聽取他人意見，從他人身上學習，唔會好似孩子王咁覺得自己啱晒。

學習欣賞女性的內在美
係人都鍾意靚嘅嘢，年輕時邊個唔鍾意靚仔靚女丫，但係係咪只有美麗嘅外貌先值得人欣賞？小時候搵另一半著重樣靚身材正，當你年少氣盛仲想ff下；但人大咗揀另一半都仲只睇外在唔睇內在，就非常膚淺。冇錯，外表唔係唔重要，但唔係唯一條件，更重要係考慮到，對方心靈上、思想上、價值觀上同自己夾唔夾，人品好唔好，係唔係一個可以同你終老嘅伴侶。美貌唔可以跟一世，唯有內在嘅美先可以延續到永久，而真男人，就好明白呢一點。

學習堅持己見
雖然上面叫大家要聽人意見，但自己都要分析，以及對重要嘅事要有堅持，唔好聽班兄弟9噏當秘笈，特別係關乎一段關係時。舉個例，你鍾意咗一個相貌平平嘅女仔，你覺得佢人好好，同你好夾，你好冧佢，但你身邊啲兄弟左一句「豬扒」、右一句「極品」，又話「你唔嗨要嗨佢呀？！畀我就唔嗨啦！」，可能頭幾次，你都為自己嘅愛情而堅持，但畀兄弟講多兩講，就禁不起動搖，結果就放棄眼前呢段愛情，最灰係咩呀？！你老X！你兄弟之後媾條女個樣仲衰啲都仲要當佢神咁拜！兄弟唔係唔重要，但自己嘅人生自己決定，特別係你認為對嘅事，更要似個男子漢咁去堅持守護。

學習兌現未來的藍圖
真男人唔係得把口，佢會認真從事業、經濟、感情各方面都帶到佢嘅未來當中，並腳踏實地咁去實現一切目標及諾言。但男孩子好多時都只會諗到自己，事事見步行步，得過且過，對將來全無planing，問佢想第日同女朋友點？唔知喎……問佢份工前景點？唔知喎……問佢將來有咩打算？唔知喎……其實唔知係正常，人總有迷茫唔知前路點走嘅時候，唔知唔係問題，但一直擺喺度唔諗就好大問題。的起心肝，認真思考下自己人生想點，逐一將理想變成自己嘅未來。

Source︰http://ca.askmen.com/dating/dating_advice/things-that-real-men-don-t-do.html