戰鬥民族不愧係戰鬥民族，做咩事都武力全開，就連cosplay都唔會馬虎，影出嚟嘅相絕對比得上日本嘅專業coser，唔怪得連日本都有講呢位俄羅斯少年Ilya Firax嘅《東京喰種》cosplay啦！

先講下《東京喰種》，其實佢係日本近年好出名嘅動漫，內容大約係講食人怪物「喰種」喺人類世界生存嘅故事，而主角金木研佢原先只係一個普通人，後來一次意外受重傷，被移植「喰種」嘅器官，從此就變成「半人半喰種」嘅生物。而「喰種」捕食或者戰鬥時，體內都會爆出赫子（捕食器官），唔同嘅赫子會有唔同嘅形象同特徵，都可以話係「喰種」嘅武器，而主角金木研嘅赫子就屬於鳞赫，鳞赫就係位於腰部，表面粗糙，造型好似觸手嘅捕食器官。好！簡介住咁多先，有睇嘅人自然會明，冇睇嘅人應該都唔太清楚Mean娜講緊咩！（利申︰睇咗第一季同re）

當然，《東京喰種》要cos人物係唔難，最難係整出神似嘅赫子，而Ilya之所以會畀網民拎出黎講，就係因為佢竟然可以神還原金木研嘅鳞赫，仲連細節都整得勁靚！配合埋攝影師Vasiliy Morozov嘅光影處理，完美重現《東京喰種》嘅感覺！一齊睇下佢嘅cosplay有幾勁啦！