「baby you hurt me so bad～」唔好以為男人老狗大大嚿個心都一樣咁實淨咁堅強，男人都係人，一樣有血有肉有感情，即使大大隻，都唔係「Yo～使乜驚？！」，當女性講啲Hurt到應一應嘅說話時，男人一樣會崩潰。

日本網站r25就做咗個調查，睇下日本男士聽到邊句說話覺得最受傷害，香港男士們又點睇先？

10.冇常識或者冇Table Manner
兩樣嘢畀人感覺都好冇文化，莫講話自尊心較重嘅男士，係人畀人講到咁低下，都會覺得Hurt嘅……

9.身材太肥或太瘦
無論係男人定女人，一樣有人會對其他人身材指指點點諸多要求，但其實男男女女都好，畀人批評身形都係會受傷害。

8.啪啪啪好弱雞
點解會覺得Hurt？仲需要解釋咩？連最可以表現雄風嘅地方都被人嫌棄，你話Hurt唔Hurt喇？

7.做嘢笨手笨腳
對男人而言，咪即係話佢冇鬼用。

6.著衫冇Taste
好多時未必係男士唔識打扮，而係男女對衣著嘅品味都唔一樣。不過就算個男仔著衫好薯都好，直接話佢著衫冇Taste，即係否定佢眼光品味，點都會耿耿於懷嘅。

5.唔靚仔
個樣生成咁，有得揀咩！

4.唔值得依賴
男性比人感覺應該係較強嘅一方，如果連感覺弱小嘅女生都覺得自己唔值得依賴，就好似冇咗作為男人嘅價值。

3.小器
有時唔係小器，而係太在乎。你條八婆識條鐵咩！

2.收入少
今時今日男人畀人比較樣貌身形都冇比較收入咁嬲，講到好似收入少連成個人都要被否定一樣。

1.畀人感覺無聊
相信每一個悶蛋都希望自己變得Funny啲，佢哋本身已經有自知之明，唔需要刻意再話佢哋無聊。