唔少日本偶像團體都好鐘意根據隊員嘅性格特質，分配唔同嘅印象顏色，例如紅色就代表勇氣、黃色就係樂觀、紫色就係神祕等等，所以大家會見到啲女團出Show嗰陣，每個人件表演服顏色都唔一樣，就好似睇緊《超級戰隊》咁。而今日介紹嘅「奥ゆい」，就係新女團《#2i2》入面嘅黃色擔當！

今年22歲嘅「奥ゆい」，本來讀緊高中個陣打算第時做一個普通OL就算，從來都冇諗過會成為偶像，直到升上大學之後，因為成日Post相上Instagram而被事務所發掘，並遊說佢出道。最終喺上年年底，佢聯同「天羽希純」、「青木りさ」、「森嶋あんり」以及「十味」4人組成女團《#2i2》，一出道即成話題，唔夠一年官方Twitter已經有近2萬名粉絲。

由於「奥ゆい」入團之前完全冇任何唱歌或跳舞嘅經驗，所以佢好勤力咁一邊參加偶像活動，一邊去上唔同課程，希望之後可以出多啲歌，最終能夠同隊友一齊喺武道館開Show。