相信有睇日本真人戀愛節目《雙層公寓（Terrace House）》嘅朋友，都對身為主持之一嘅「トリンドル玲奈」印象深刻，事關佢擁有德國及日本血統嘅佢，五官好似洋娃娃咁精緻又有氣質非常標青。最近佢就宣布即將喺出年1月23日出寫真賀30歲牛一，而且強調入面會有前所未見嘅性感水着同內衣造型，不過大大話話都要等成2個月，咁就同大家重溫一下舊相望梅止渴先啦！

今年29歲嘅「トリンドル玲奈」爸爸係德裔奧地利人，媽媽係日本人，出生於奧地利維也納嘅佢，自細就因為爸爸工作關係而先後定居過日本、奧地利、法國及美國等多個國家，但正因為咁所以學識流利德文、英文以及日文。而佢嘅167cm身高加上精緻嘅五官，令佢早喺高中時期就被星探發掘，繼而出道做Model，曾經擔任過著名時尚雜誌《ViVi》專屬Model，而目前就係另一本時尚雜誌《with》專屬Model。

除咗Model事業之外，「トリンドル玲奈」早於2012年就跨足影視圈，出道作為《黑之女教師》，而且同恐怖片好似特別有緣，先後出演過《咒怨：死結的開端》及《真實魔鬼遊戲》等驚悚電影。現時最新綜藝作品就係由ABEMA製作嘅戀愛節目《私たち結婚しました（我們結婚了）》第2季，佢將會同男星「浅香航大」扮結婚做夫妻，之後一齊做下任務嗰啲，有興趣嘅朋友可以留意一下。