正所謂「愛笑的女生運氣不會太差」，鍾意笑嘅人能夠畀人一種友善、好相處嘅感覺，大家自然都會對佢好啲。今日介紹嘅「志田音々」就係一位非常鍾意笑嘅女仔，希望大家睇完都會被佢嘅正能量感染到。

今年23歲嘅「志田音々」目前係成城大學文學部4年級生，身材高挑勻稱，有住天真爛漫嘅甜美笑容，帶畀人滿滿正能量。早喺16歲就參加選美比賽「Miss Teen Japan」贏得亞軍，不過當時並冇出道而係選擇專注學業，直到考上大學後先正式入行拍寫真，而且仲喺靜岡電視台做過一年天氣女郎，試諗吓如果朝朝見到佢笑住同你報天氣，我諗無論晴天陰天雨天都會好似太陽咁溫暖。唔知佢第時畢業之後會有咩打算呢？