日本女藝人嘅「銜頭」通常有兩款，一款就係有幾大吹幾大，例如環奈BB當年被稱為「千年一遇美少女」，然後就有好多「二千年一遇」、「一億光年美少女」等等；另一款就係強調個女仔有幾普通，好似今日要介紹嘅呢位「たゆらもも」咁，就不停強調自己只係一名「普通女子」，但佢又可以上到雜誌封面喎。

根據個人簡歷，「たゆらもも」2002年出生於日本兵庫縣，琴日(24日)正正係佢生日，今年剛滿20歲。而喺2021年前，たゆらもも的確係一個普通日本女仔，但2021年4月搬咗去東京後，先係加入著名時裝Show「Tokyo Girls Collection」嘅模特兒學校，然後火速拍攝電視劇、廣告、服裝品牌代言。出道唔夠一年，近日更加登上《週刊Young Jump》水著出道，發展可謂飛快。

更重要嘅係，從水著寫真可以見到身高163cm嘅「たゆらもも」唔單止有對白滑長腿，上圍更加係禾桿冚珍珠頗有睇頭，再配上純過Meko純水嘅氣質。難怪《週刊Young Jump》形容佢係「期待度1000%嘅超新星」。或者未來大家就能夠睇到更多佢嘅水著性感寫真啦！

圖片：tayuramomo on IG