細個啲長輩教落，要搵個「入得廚房，出得廳堂」嘅女仔做老婆。不過時移世易，雖然依家好多女仔都絕對「出得廳堂」，但同時佢唔少人甚至係連蛋都唔識炒，令「入得廚房」嘅女仔變得更加矜貴！好似今晚要同大家介紹嘅呢位「萩田帆風」咁，外表已經好吸引，知道佢好鍾意料理之後，直頭想即刻娶佢做老婆呀！

現年22歲嘅萩田帆風，最早係於2017年以「中部地區冠軍」參加全日本「女子高中生小姐 (女子高生ミスコン)」比賽，並獲得準優勝而出道。隨後佢除咗接受過《週Play》訪問及寫真邀約之外，亦曾參加舞台劇演出。自2021年6起，佢就以五期生身份加入女子偶像團體「SUPER☆GiRLS」開始偶像活動，間中亦會為雜誌拍攝寫真。

而早前佢就事隔年半再次為《週Play》拍攝寫真。據佢接受訪問時指，呢年半以來佢因為努力工作而瘦咗，而且體力仲好咗，以往拍完寫真第二日會週身痛，但今次就冇事。同時佢近來亦愛上煮飯，尤其熱愛食魚，甚至一個星期食4、5日魚，而佢嘅拿手好餸就係其實幾難整嘅麻婆豆腐。佢甚至話覺得依家間屋個廚房太細有礙佢發揮，希望第時可以搵間廚房闊落啲屋黎住，你睇佢幾熱愛廚房！再加上大家都有眼睇嘅身材外貌，好老婆咪就係呢啲囉！

IG：honchandaayo