俗語有云：呢個世界無醜嘅女人，只有懶嘅女人，事實上無論天生有幾靚 (不論男女)，如果後天唔加以打理嘅話，一樣好快會年老色衰。好似出道超過十年、一直以黎都係女神級嘅日本演員「佐野ひなこ」咁，佢日前就直認自己靚到咁都曾經要打Botox！

現年28歲嘅「佐野ひなこ」，早於2012年就已經作為日本攝影師兼雙馬尾協會會長「古谷完」推出嘅攝影集封面女郎而出道，隨後就憑住其可愛面貌、33G上圍以及到依家都維持喺20吋嘅超幼腰圍而聞名。經過短暫嘅寫真偶像生涯後，近年多數於演員方面發展，但間中都會為雜誌拍攝寫真，久唔久亦會推出個人寫真集，十年黎身材樣貌都維持住極高水準。

不過，早前佢於IG回答粉絲問題時，就直認自己曾經於眉骨、眉心、腮及下巴等四個部位打過肉毒桿菌 (Botox)，甚至曾經為咗維持好身材而打脂肪溶解針。除咗其坦白態度令Fans們驚訝之外，大家更驚訝嘅係靚到佢咁都要靠整形黎維持美貌。

不過「佐野ひなこ」後來亦補充，近來已經冇再打Botox，因為每次打完個咀都郁唔到非常麻煩。而喺維持纖腰方面，佢就話自己平時非常著重腰部線條，但比起做Sit Up等腹部運動，佢就會多做深蹲鍛鍊下腹，另外仲會做普拉提黎訓練核心肌肉。睇完只能夠講，靚女真係唔易做呀！

IG：hinako_sano