演員有時為咗準備一個角色，有時會做埋啲其他人睇落覺得匪夷所思嘅嘢，好似當年Robert De Niro就為咗演好《Taxi Driver》就真係走咗去紐約摌的士。而今日要介紹呢位「小南満佑子」當然冇Robert De Niro咁出名，但佢為咗演戲都一樣做咗啲「怪事」，就係去咗影寫真！

現年27歲嘅「小南満佑子」自從細過睇過日本版嘅《窈窕淑女》音樂劇後，就立志要成為一個音樂劇演員，所以佢開始學跳舞、聲樂，到高中時更成功通《Les Miserables (悲慘世界)》音樂劇嘅試鏡，只係因為當時年紀太細未能正式演出，只以學徒身份陪練。

到大學畢業後，佢除咗如願出演《Les Miserables》外，更出演過《Titanic》音樂劇版等多部音樂劇，同時於2019年起進軍電視圈。

照咁睇，「小南満佑子」係完全過哂「靠寫真累積知名度」嘅階段，咁點解佢近排會突然走咗去影寫真呢？佢接受《週刊Playboy》訪問時就話：「與其話我想影寫真，不如我想被大家睇下我嘅身材比例，因為身體就係演員嘅武器之一，咁做會提升我嘅自信。同時我成日都扮其他人嘛，所以我都想做返『小南満佑子』，等大家認識我多啲。」佢仲話：「有時要演出啲清純角色，身材唔可以太好，所以我都會用紗布紮住上台。」言下之意即係話佢都知自己身材幾有睇頭！唔知大家又同唔同意呢？

IG：mayuko_kominami.official