雖然話於網絡世界、社群媒體之中，任何都可以有成名嘅機會，但有時呢啲成名機會往往會黎得猝不及防，甚至奇奇怪怪、尷尷尬尬。好似今晚要同大家介紹嘅呢位「ときちゃん」咁，就因為上年一條無心插柳嘅「尷尬兔女郎跳舞片」而爆紅，除咗一舉將佢送入寫真界外，更令佢一度成為寫真銷量冠軍！

現年28歲嘅「ときちゃん」自2021年起就成為TikTok創作者，憑住時而搞笑、時而性感、時而仲玩埋「百合」嘅影片，以及於X（Twitter）上發佈嘅性感造型相而獲得眾多追蹤。不過要數到佢真係廣為人知嘅契機，就要講到去年大約4月時，佢應TikTok Fans嘅要求而著起性感兔女郎服裝於家中拍攝，期間為免浪費個裝扮，於是順手拍多條15秒嘅跳舞短片。

唔知係佢咁啱個肚唔舒服定係套衫太令人害羞，反正影片初段就見到佢可愛地「扭扭擰擰」，然後突然進入狀態賣萌跳舞。結果佢將呢段集可愛、性感、反差於一身嘅影片放上X後，瞬間就吸引到數百萬次觀看，一度成為日本網絡熱話。佢嘅X追縱人數亦於一個星期內暴增10萬。（影片Link）

亦因為呢次爆紅，佢於去年7月就獲得日本雜誌邀請拍攝水著寫真，結果一躍成為DMM寫真榜上嘅銷售冠軍，隨後後為《Weekly Big Comic Spirits》及《週刊Post》等雜誌拍攝嘅性感寫真亦獲得大眾一致好評，成為近年從KOL界轉戰寫真界最成功嘅例子！

IG：tokicha1995