之前我哋同大家介紹過唔少關於「AI美女」嘅新聞，例如「AI陪聊服務」、「AI AV女優」、專整AI美女圖嘅Facebook專頁，以及去年5月日本雜誌《週刊Playboy》首次刊登AI美女寫真。而近日AI美女再下一城，登上埋全球著名成人雜誌《Playboy》。更令人驚訝嘅，係呢位「Samantha Everly」唔只有相，仲有片，而且真係幾乎毫無破綻！

話說去年夏天時，網絡上出現咗一個名為「Samantha Everly」、自稱係個美國工程師、並有經營賣相平台嘅「美女」。雖然佢啲相有頗為明顯嘅「AI感」，所以好快大家就知佢係一位「AI美女」，不過亦無阻大家爭相追蹤，令佢於短短一年內就累積超咗過14萬IG Followers，近來更獲得墨西哥版《Playboy》邀請，登上最新一期封面。

《Playboy》仲好有心機咁用AI聊天機器人整咗個「Samantha Everly」人格進行訪問。「Samantha Everly」指登上《Playboy》係一個夢寐以求嘅機會，同時亦指大家應該利用而非懼怕新科技。當被問到自己與普通人嘅區別，「Samantha Everly」就指自己作為電子產物唔會衰老，「但老去都有其美麗及智慧」，同時亦表示自己羨慕普通人可以「食Tacos、呼吸海風、感受太陽照落皮膚嘅暖意」，回答得相當大方得體。

不過「Samantha Everly」走紅嘅更大意義，或者在於顯示大眾（只少係鍾意睇女嘅人）其實並不抗拒「AI美女」。更重要嘅係，上年2月我都教大家點樣分AI美女時，都仲搵到AI圖嘅明顯破綻，但一年後嘅今日，「Samantha Everly」唔單止有相仲有片，而佢啲片真到就算大家明知佢係AI美女，有心去都未必睇得出破綻，絕對呃得到人。科技發展真係一日千里啦。

資料來源：Playboy

IG：samanthaeverly33