清明已過，立夏將至，換言之各位男士喜聞樂見嘅夏天終於要黎啦！而你話夏天有咩好睇得過一個充滿活力，笑得又鬼咁燦爛嘅美女喺你面前揮灑汗水呢？所以今晚就同大家介紹呢位日本新人演員「田畑志真」！

平安夜出世嘅「田畑志真」雖然只係啱啱18歲無耐，但其實佢嘅演藝資歷相當豐厚。早於4歲就因為哥哥嘅朋友嘅媽媽介紹，所以簽約成為兒童模特兒。小學五年級時因為想演戲而從家鄉熊本搬去東京就讀演藝學校，2016年就已經開始出演電視劇，至今演出過至少14部劇集，5部電影，仲出演過伊藤園、大森屋嘅廣告，事業發展得非常順利。

「田畑志真」亦好鍾意運動，除咗本身擁有「騎馬執照」之外，佢仲話近來開始練習動作戲，希望將來有機會出演《幪面超人》系列。或者正因為咁，所以去年10月首次挑戰寫真時，《週刊Young Jump》就將鍾意棒球嘅佢帶到去棒球場上拍攝。陽光之下佢皮膚白到反哂光之餘，燦爛笑容亦唔比太陽遜色。今年3月佢再接再勵，以放學後去海邊滑浪為主題再次為《週刊Young Jump》拍攝，效果同樣甜美可愛。睇黎真係非常適合陽光運動風。

IG：shiima1224