四月時我同大家介紹過，因為台上表演時被Fans影到超靚相，號稱能夠與橋本環奈當年爆紅嘅「奇跡的一枚」媲美嘅地下偶像「中川心」。咁既然佢靚到身在香港嘅我哋都知道，日本嘅各大雜誌又點會放過佢呢？所以事隔近兩個半月後，「中川心」就接連為少年雜誌拍寫真啦！

話說今個禮拜，日本著名雜誌《週刊Playboy》及《FRIDAY》先後刊出「中川心」嘅寫真，其中發行時間較早嘅《週Play》更係佢自2021年於地下偶像團體出道以來首次嘅雜誌寫真。據佢接受《週Play》訪問時透露，自細佢就因為鍾意AKB48嘅「大島優子」，以及℃-ute嘅「鈴木愛理」而有個偶像夢，亦促使佢自高中二年級起就開始參加女團嘅徵選。

不過佢嘅偶像之路就開始得相當不順暢。佢於「ユリシス」出道僅一年後就於2021年4月因為團體解散而被逼畢業，隨後加入另一女團「UNiSON」，結果6月連「UNiSON」都解散埋，於是8月佢又轉到第三個團體「ワンチャンアリーナ」。活動咗半年後佢再次轉會，加入「BABY TO KISS 」，並於2022年10月被提拔到同系統女團「HOT DOG CAT」，最後於去年5月離開「HOT DOG CAT」，加入依家嘅「あまいものつめあわせ」。

而早前嘅佢嘅「奇跡的一枚」，正正就係於最新團體「あまいものつめあわせ」公演時被拍下。對於被拎黎同環奈BB做比較，佢話其實自己相當驚慌。而且由於佢本身就係環奈BB嘅Fans，所以高中時期嘅自我介紹就係「焼津（日本地名，佢家鄉）的橋本環奈」，本身就係諗住自嘲引人吐糟，點知最後真係能夠同環奈BB相提並論，所以覺得整件事非常神奇。

唔知各位睇完「中川心」嘅寫真，又對佢嘅未來發展有咩期望呢？

IG：556_nakagawa