香港媒體形容一個擁有長腿嘅女仔，通常都係用「XX吋長腿」、「X頭身」黎形容。但「XX吋長腿」通常係由盤骨計起，即係實際上包埋Pat Pat嘅部份，而「X頭身」更多係講緊身材比例而非腿長。對於呢個話題，日本就有個好直觀、由跨下開始計嘅「股下腿長」。而今晚要為大家介紹嘅呢位「小嶋明梨」，就按「股下腿長」都可以號稱「半個人都係腳」，咁你話佢對腳有幾長嘞？

開估！現年21歲嘅「小嶋明梨」，股下腿長係80cm，而佢本人「只係」得166cm高，換言之佢成個人有48.1%係腿黎，話係「半個人」實在亦不為過。擁有呢對驚人長腿嘅佢，演藝事業自然發展得有聲有色，除咗曾經出演過YouTube短劇、拍過廣告、以及曾經於電視劇、電影中客串之外，佢今年3月及8月亦先後推出兩隻寫真DVD。8月時亦成為日本《週刊実話》嘅第七代「Miss週刊実話」，可以話係取得一個成功嘅起步。

而佢於接受訪問時，亦提到自己嘅身材引起嘅笑話。卻說因為佢以日本女仔黎講頗為高挑，加上身型纖瘦比例又好，所以唔少都以為佢係個運動健將。但事實上佢就係一個「身體白痴」，除咗身體較為柔軟外就「一無是處」，就連讀書時體育考排球都只係得兩分，同朋友打時更加係不停被針對，佢自己都覺得自己有潛力於綜藝節目憑身體搞笑獲得大家歡心。至於佢有冇呢個機會，大家就要期待下啦。

IG：akarin_kjkj