大部份同賭有關嘅嗜好，都係以男性客群為主，照道理你放個靚女去做主持應該好吃香。但偏偏男人去到呢啲時候就好鬼理性，靚唔夠㗎，你仲要真係有料，最好仲要畀到贏錢貼士，大家先願意睇你。所以今晚要介紹呢位「松本日向」能夠於日本賽艇界佔一席之地，其實都唔容易！

現年23歲嘅「松本日向」，最早係於2016年參加AKB48於福岡嘅姊姊團HKT48出道。出道初期佢以165cm身高加上「模特兒級外表」，以及獨得嘅關西腔作為主要賣點。但2021年佢公開自己有睇賽艇嘅習慣後，就漸漸獲得參加相關節目嘅機會。2023年5月起更加做埋賽艇節目嘅主持，成為日本嘅賽艇女神。今年起仲開始拍埋寫真添！

佢曾經於訪問中表示，自己幼稚園時爸爸就會帶佢去睇賽艇，所以自小就對於呢項運動相當感興趣，能夠將佢變成工作嘅一部亦非常好玩。另外佢仲提到賽艇Fans一般都係相當嚴格嘅人，但對佢就特別包容，就算佢Tip錯賽果Fans都會話「如果係日向醬的話就可以」。不過佢冇打算單靠賣樣做人，所以未來會繼續鑽研賽艇，希望將自己嘅命中率提高到80%。唔知佢呢份努力又有冇命中各位嘅心呢？

IG：matsumoto_hinata