過去已經有多個關於兩性擇偶嘅研究，指出（大致上啦下）男性擇偶主要睇樣、女性擇偶則主要睇錢。不過過去嘅研究通常都係採用「自我報告」，即係受訪者自己回答問卷等形式進行，所以數據上有可能被受訪者嘅主觀性影響。而近日就有研究者利用更為客觀嘅眼球追蹤技術，觀察年輕男女於觀看交友App上異性個人檔案時會注意咩訊息，從而得知更加真實嘅擇偶行為。

話說美國New England大學臨床心理學系助理教授Amy D. Lykins早前於科學期刊發佈咗一個新研究成果。佢先創造出一系列外貌、收入及職業均有高低不同嘅虛驚交友App個人檔案，並搵黎年齡介乎18至27歲嘅男女大學生各20名，並利用眼球追蹤技術去觀察受訪者觀看呢啲個人檔案時究竟會將注意力放喺邊啲資訊，從而較為客觀地得知佢哋嘅擇偶條件及行為。

研究嘅第一個發現，係外貌真係非常重要。事關無論呢啲虛構個人檔案嘅其他地方寫咗啲咩，受訪者都將大部份時間分配於個人檔案中嘅照片部份，整體而言受訪者淨係睇相就已經用咗83%嘅時間。證明至少喺交友App上擇偶黎講，有張靚仔或靚女相係至關重要。

更深入嘅分析就發現男女之間嘅不同。研究並不出奇地發現，男性受訪者比女性受訪者花更多時間觀看異性個人檔案嘅面孔部份，亦相對地更少注意如收入或職業等資訊。但你又唔好以為男人永遠都睇樣咁膚淺喎，因為當男性受訪者睇到個冇咁靚女嘅個人檔案時，佢哋就會花更多時間去睇其他資訊，特別係當女性擁有高收入或高地位工作嘅時候。亦即女性嘅收入及工作仍能某程度地影響男性嘅注意力。

另一邊廂，女性受訪者雖然都係睇樣為主，但佢哋睇樣嘅時間係取決於虛構個人檔案中男性嘅收入及工作高低，而且係遇上低收入或工作地位較低嘅男性時，女性受訪者會花更多時間去睇樣。研究指咁係因為女性遇上低收入或工作地位較低嘅男性時，會更仔細地審視佢哋個樣，睇下能唔能夠「彌補」到收入或工作上嘅不足。

另外研究亦有訪問到受訪男女對於虛構個人檔案嘅吸引力評價，以及有想同呢啲虛構人物發展長期或短期關係。結果發現不論虛構女性嘅收入或職業為何，男性受訪者都更偏好發展短期關係，加強咗以往研究得出，男性於不用考慮長遠資源投資嘅情況下，會優先考慮女性外表嘅結論。而女性受訪者則偏好與虛構男性發展長期關係，特別係收入及工作地位高嘅男性，同樣地印證過去進化學研究中，女性尋求有豐富資源嘅男性建立長期關係，以為後代提供保障嘅理論。

資料來源：Visual Attention to Evolutionarily Relevant Information by Heterosexual Men and Women While Viewing Mock Online Dating Profiles