之前我就同大家報導過日本年輕人正流行「取消沖涼」（風呂キャンセル）風潮，顧名思義就即係因為各種原因而決定唔每日沖涼。而今晚要介紹呢位偶像成員「鈴木Mob」就因為自曝曾經四日唔沖涼，而令話題進一步擴大而成為「取消沖涼界始祖」。唔知各位又接唔接受到呢？

4月即將滿26歲嘅「鈴木Mob」，係日本偶像團體「にっぽんワチャチャ」（Nippon Wachacha，原名Nippon Virus，但因疫情而改名）嘅創始成員之一。2020年出道嘅佢，本來係以後臀肌特別發達、號稱「正面都睇到Pat Pat」而聞名。但近來佢因為於直播上自曝支持「取消沖涼」，仲話自己曾經4日唔沖涼而引起熱議，更因為其偶像身份以及知名度令話題進一步擴大，所以近來又多咗個「取消沖涼界始祖」嘅稱號。

據佢近來接受《週刊SPA!》訪問時指出，其實「取消沖涼」呢家嘢唔係佢提出，佢亦只係留意到呢個風潮後分享自身經驗，所以唔算係「始祖」。但佢同時亦指出事情發生後佢同Fans間嘅互動變得更加豐富，例如見面會時大家見到佢就問「你有冇沖涼呀？」又或自我介紹時會話「我已經三日冇沖涼」等佢吐糟。佢認為呢個變化非常有趣，但亦笑言以後都唔使旨意接到沐浴露廣告。

IG：wachacha_mob