唔少寫真女星都係透過參加日本各大出版社舉辦嘅寫真選美比賽而出道，而且因為呢類比賽通常美女雲集引人注目，又有出版社支持不乏曝光機會，所以一旦有拎到獎，好容易就能夠於寫真界站穩陣腳。不過今晚要介紹呢位「山本栞」就可能係個例外，四年前拎到獎之後，要到去年換埋經理人公司先可以於寫真界大展拳腳。

現年27歲嘅「山本栞」早於2021年就已經贏到雜誌《週刊SPA!》舉行嘅第一屆「Miss SPA!」比賽冠軍，理應老早就成為寫真界獨當一面嘅人物。不過佢近日接受《News Post Seven》訪問時，就指出過去四年嘅寫真作品量及成績其實都唔太好，令佢覺得愧對一路支持佢嘅Fans。好在去年12月佢就轉投以捧紅寫真女星出名嘅「PP エンタープライズ」，並獲得公司大力支持，其效果亦立竿見影，近大半年多次登上各大雜誌，算係努力追返過去四年落後嘅進度。

「PP エンタープライズ」呢間公司本身亦值得介紹。其前身係日本著名Cosplayer兼寫真女星「乾曜子」於2018年成立嘅個人事務所，後來就發展成專門經營寫真女星嘅經理人公司。目前其當家花旦就係Cosplayer出身嘅「Enako」，同時亦有如「東雲うみ」、「伊織もえ」、「似鳥沙也加」等當紅寫真女星。所以今次「山本栞」都算係泊啱碼頭。希望佢未來都有更多寫真作品供大家欣賞啦！

IG：yamamoto__shiori