唔知大家覺唔覺得，近年年輕人嘅打扮、舉止甚至思想都越黎越老積，似乎無咗我哋年輕時嘅嗰種青春、純真。如果你都懷念呢種感覺的話，咁你就可以多啲留意今晚介紹呢位「東条澪」，事關即使佢已經大學畢業，但仍然有住童顏童心，甚至被Fans笑佢幼稚添呀！

現年23歲嘅「東条澪」，早於3歲就已經出道做兒童模特兒，一路做到初中時先暫停。結果高中時又再次被星探發掘再次出道，並於去年參加針對日本各大學社團女性已舉行嘅「Miss Circle」選美比賽，並獲得冠軍而成名。同時佢亦係日本女性時尚雜誌《Zipper》嘅專屬模特兒，今年7時仲加入埋日本女團「AND CaaaLL」。同時由於係選美比賽出身，「東条澪」好自然吸引到日本雜誌嘅寫真邀約，並於9月為《週刊Playboy》拍攝首輯單人寫真。又模特兒又偶像又寫真咁，都算係百足咁多爪啦！

有趣嘅係，雖然「東条澪」已經係個不折不扣嘅成年人，但佢個樣就非常細個，同時佢嘅行為亦相當小朋友。例如早前推出嘅雜誌寫真明明係以「與學校社團女神約會」為主題，但結果佢又跑又跳仲去爬公園啲馬騮架，搞到Fans都忍唔住吐糟「邊有大學生會咁做？」。但吐糟還吐糟，喺依家呢個環境都仲可以保持童心，某程度上都係佢嘅吸引之處——最緊要佢身材唔「童」呀嘛！

IG：tojo_ren