我知架，你哋實覺得文青有啲痴痴地線又變變地態(不過真心唔夠Mean娜變)，一早就應該比人拉入青山，做咩今時今日突然良心發現要自首？咁你就錯啦，因為文青要入嘅呢個青山，唔係喺屯門，而係日本嘅青山學院大學！

話說上年都介紹過嘅日本「Miss College 2015」又黎啦，其中關東地區嘅青山學院大學、上智大學、慶應義塾大學、東邦大學、橫浜市立大學同關西地區嘅關西大學已經率先選出候選人，有啲仲已經接受緊投票添。就目前公佈咗嘅六間學校候選人黎睇，水準普遍都係麻麻地，但青山學院就出咗個一睇就知會贏嘅山賀琴子！