香港嘅茶記文化，一字寄之曰：快！而當中嘅佼佼者當然係「澳牛」嘅光速餐，甚至唔少遊客都會特登去體驗一下。但原來「光速餐」並唔係香港獨有，日本福岡縣「Mr.George 東合川店」明明係間漢堡扒店，但一樣可以做到30秒上餐，甚至最快13秒就上到菜！

圖片：TBS 《THE TIME,》

「Mr.George 東合川店」係一間位於日本福岡久留米市，國道210號旁邊嘅一間漢堡扒店，其最出名嘅係極快嘅上餐速度，快到曾經多次有電視台訪問佢哋。而據店主古賀聖治先生指，佢係因為見到拉麵店等其他餐廳都可以極快上菜，覺得自己都應該能做到，所以決定改善備餐、點餐流程，達到最快13秒出餐嘅紀錄。

而據YouTube頻道「福岡うまかTV」介紹，「Mr.George 東合川店」之所以能夠做到光速上餐，因為全店所有職員配合。由於允店內基本只提供漢堡扒，點餐只會有配料、醬汁等分別，所以店員會事先煎好所有漢堡扒，然後放入保溫櫃。當客人黎到門口，哪怕係揸車，店員都能一眼數到有幾多名客人，客人未入門口就已經好似將漢堡扒再加熱，客人點餐後只需加上配料醬汁就可以上菜。