之前為大家報導過Dyson、Benz F1車隊幫手生產呼吸機；LVMH都幫手生產消毒洗手液、防護衣。前者就唔希望大家有機會用，後者大家想用都冇呢個機會，但GIR出嘅矽膠口罩，大家或者就有用又用得到啦！

男士們對GIR呢個品牌未必好熟悉，因為呢間美國公司本業其實係生產矽膠廚具，但大家都知美國疫情未過，市面上亦缺乏口罩等物資，於是就決定推出矽膠口罩。據官網所指，口罩會使用通過美國FDA及德國LFGB認證嘅矽膠製作，正面有多個小孔，背後就貼上可更換濾層，每次使用完之後只需將個口罩放入熱水中叮30秒，或者放入洗碗碟機，甚至只係用梘液加熱水洗乾淨，晾乾後就痴返張濾層上去就得。

GIR明確指出呢個口罩不能代替醫護人士使用嘅N95，但對於只係想出街買餸時有一定保障嘅普通市民黎講，就係一個唔錯嘅替代品。加上有多種顏色，售價亦唔算貴，單個買15美金送5個濾層，10個濾層替換裝盛惠10美金。100個套裝就只需750美金，即7.5美金一個。最快4月23日開始出貨。假若大定想知道更多詳細規格，就可以去GIR嘅官網睇下啦。