【常規賽完結】2017-18球季NBA各大獎項預測！

文：MenClub 波特先生　　圖：互聯網
POSTED ON 13 Apr 2018


今季NBA常規賽已經結束，好快季後賽嘅戰火就會展開，而呢個時候就可以順勢預測一下今季各大獎項嘅情。同往年一樣，常規賽繼續有六大獎項，分別係最佳球員(MVP)、最佳新秀、最佳防守球員、最佳第六人、最佳進步球員及最佳教練。

經過一整季82場嘅賽事，有部份獎項嘅得獎者都非常明顯，相反有部份獎項非常難揀，其中最難揀嘅應該就係最佳新秀。以下係MenClub Sport對六大獎項嘅預測：
最佳球員MVP：James Harden(火箭) 候選球員：LeBron James(騎士)、Anthony Davis(鵜鶘)

今季火箭成為聯盟一哥，隊內核心James Harden嘅功勞無疑係最大的，當身邊多左Chris Paul呢位好幫手，佢今季進攻變得更加銳利，場均得分升至30.4分，成為今季得分王。同時，Harden嘅勝利貢獻者及PER效率值亦都係所有球員當中最高的，所以今季MVP獎項絕對係非佢莫屬！

最佳新秀：Ben Simmons(76人）候選球員：Donovan Mitchell(爵士)

作為2016年嘅選秀狀元，Simmons今季正式復出上陣，而佢嘅出現可以話震驚住成個聯盟，以接近7呎嘅身高打控衛，憑住廣闊嘅視野及魔術一般嘅傳球，Simmons展現出全能嘅表現，以新秀身份取得12次三雙，係NBA歷史新秀當中第二多的，僅次於傳奇「大O」Oscar Robertson。另外，76人喺季後尾有Joel Embiid受傷，但球隊卻成功打出一波16連勝，最終以東岸第3位重返季後賽，其中Simmons絕對係居功自偉。

不過，最佳新秀可以話係最難揀嘅獎項，因為爵士新秀Mitchell嘅表現亦都可以話令人眼前一亮。場均可以取得20.5分，係爵士隊內嘅得分王，要知道球隊本來失去Gordon Hayward呢位全明星球員後，有唔少人認為佢地可能要進入重建期，但因為Mitchell佢地今季成功奪得西岸第5嘅席位。另外，因為Mitchell先係名正言順嘅「新秀」，所以有唔少人都力撐Mitchell先係最佳新秀嘅最佳人選。

最佳防守球員：Rudy Gobert(爵士) 候選球員：Joel Embiid(76人)

今季爵士打出全聯盟防守效率第二嘅表現，上面講過佢地能夠奪得西岸第5絕對係始料不及的，其中防守絕對係重要嘅一環，而球隊防守嘅核心就係中鋒Gobert。據統計，Gobert今季嘅DRPM達到5.23，係全NBA最高的，排名第二嘅David West也就只係4.67，雙方差距達到0.56。另外，Gobert場均封阻達到2.3次，排名聯盟第三位。

而Embiid其實唔少人都已經肯定左佢喺三分線內嘅防守鎮攝力，但佢今季嘅DRPM就只有3.51，排名聯盟第9位，因此難以同Gobert相提並論。

最佳第六人：Lou Williams(快艇) 候選球員：Eric Gordon(火箭)

作為後備嘅Williams今季場均取得生涯新高22.6分，與巫師主力得分手Bradley Beal並列聯盟第13位，可見佢嘅得分能力有幾恐佈。雖然Williams今季上陣79場比入面，60場為後備，但佢嘅上陣時間其實達到32.8分鐘，較為可惜嘅係今季快艇未能打入季後賽。

最佳進步球員：Victor Oladipo(溜馬) 候選球員：Clint Capela(火箭)

呢個獎項差唔多無咩懸念，因為今季轉投溜馬嘅Oladipo實在太令人驚喜。一年前效力雷霆嘅時候，佢場均只取得15.9，被人質疑佢作為球隊二哥嘅身份。轉戰溜馬後，Oladipo成為球隊核心，場均得分提升至23.1分，並生涯首次入選全明星陣容，而溜馬亦喺一致被看淡下成為東岸第5位，Oladipo嘅表現可以話係最大關鍵。

最佳教練：Mike D’Antoni(火箭) 候選教練：Dwane Casey(速龍)

火箭今季取得隊史最佳戰績65勝17負，並成為聯盟一哥，而主教練D’Antoni喺比賽中亦不時展現出精彩戰述，甚至令Chris Paul亦忍唔住讚好。

速龍主教練Casey當然亦都係大熱門，佢帶領球隊成功打出隊史最佳戰績，並壓倒塞爾特人及騎士等強隊奪得東岸冠軍。