呢排同朋友們嘅茶餘飯後話題都離唔開 Netflix，無他嘅近排都好多不同類型嘅作品陸續喺 Netflix中上架（毒L嘅私心推介當然係18年季度嘅 Fate/EXTRA 終於上架），加上各大小傳媒紛紛報導（剩係 MenClub 呢度都有好幾篇啦），而最重要嘅係 Netflix 嘅開國功臣《紙牌屋》——House of Cards 推出新一季，令到唔少本身無畀開錢買 Netflix 服務嘅人都老老實實地喺 Payment Method 度打低自己 Credit Card 嘅資料。

《紙牌屋》——House of Cards

好嘞，除咗上面我嘅私心推介，《紙牌屋》新一季同埋呢期我哋 MenClub 報導過嘅幾部影視作品之外，今日我喺度講嘅一套尚未上架嘅 Netflix 原創電影，我未有得睇已經畀佢個故事簡介同 YouTube 嘅 Trailer 深深吸引，想喺度打篇文推大家一齊入坑。

《逃犯國王》——Outlaw King

故事由真人真事改篇，以中世紀蘇格蘭以及英格蘭之間嘅戰事及衝突作背景，主要講述羅伯特·布魯斯，從當日因戰敗而落泊嘅一名貴族，點樣因時勢而成為一個不計後果，踩界亦在所不惜嘅叛亂之徒，企圖奪取奪取蘇格蘭王位，並試圖以自己勢力去對抗當時暴虐嘅英格蘭國王——愛德華一世。

中世紀、東山再起嘅故事，再加上係以呢位傳奇人物——羅伯特·布魯斯嘅故事作背景嘅一套作品，對我嚟講確實係欲罷不能；再加上由上年DC女英雄電影 Wonder Woman 入面嘅男主角 Chris Pine 做主演，加上導演由 David Mackenzie 呢個拍出 《非正常械劫案》呢部 2016年 金球獎最佳劇情片嘅導演擔任，品質有返咁上下保證啦。