LeBron James與Dwyane Wade呢兩位好兄弟兼好對手，正式完成雙方生涯最後一次常規賽對決，因為Wade已經決定今季完結後退役，而尋日湖人對熱火亦係兩支球隊今季常規賽最後一次對碰，所以除非湖人及熱火分別打入季後賽兼殺入總決賽，否則LeBron及Wade將唔會再對上了。

由2003年以新秀身份一齊加入NBA，到慢慢成為場上嘅宿敵，再聯手成為隊友合力奪得總冠軍，成為真正嘅好兄弟。如今雖然雙方已經唔再係隊友，但永遠都會係最好嘅兄弟。

而講起LeBron與Wade嘅聯手相信至今仍然為人津津樂道，其中講到兩位最經典及最令人印象深刻嘅則絕對要數以下呢張相。

呢張相係2010年熱火vs公鹿嘅比賽，Wade助攻給LeBron完成一次強力入樽。而當你回想起呢張相，你第一時間係咪會諗起Wade將個波拋高，然後LeBron完成一次「拆你屋」入樽呢？不過，事實卻完全唔係咁，「曼德拉效應」好似喺呢件事上出現左。

事實係，當時Wade快攻控球上前場，然後將個波以彈地傳給後上嘅LeBron，LeBron然後獨自起跳完成呢記強力入樽，同時Wade則完全唔望LeBron嘅入樽振臂高呼。