自從《銀魂》電影一出，橋本環奈嘅天使美少女形象就開始歪掉，變成擁有強勁顏藝嘅搞笑美女。不過呢個形象似乎深受大眾喜愛，試問一個唔介意扮醜嘅靚女，係幾咁討人歡心？於是環奈BB接連幾套電影同日劇，都展現出佢精彩嘅顏藝，令人拍手叫絕，嚟緊《輝夜姬想讓人告白》呢套漫畫真人電影化，請來橋本環奈擔任女主角，唔知到時環奈BB嘅顏藝會唔會更上一層樓呢？

《輝夜姬想讓人告白》全名係《輝夜姬想讓人告白~天才們的戀愛頭腦戰~》（日語：かぐや様は告らせたい〜天才たちの恋愛頭脳戦〜），佢係日本漫畫家赤坂アカ所創作嘅校園漫畫作品，現於《週刊YOUNG JUMP》2016年17號上連載中。呢套漫畫故事係講述菁英學校「秀知院學園」嘅學生會副會長四宮輝夜同會長白銀御行對彼此都有好感，但兩人嘅自尊心都唔允許自己向對方告白，兩人都認為自己只要先告白就會輸，所以每日都諗點令對方先向自己告白。

而《輝夜姬想讓人告白》其實喺今年一月已經開播緊TV動畫，可能見反應好好，近日官方宣布真人電影化決定，並由橋本環奈以及平野紫耀領銜主演，德永友一負責劇本。

真人版電影預定今年9月6日就會正式上映，好期待再之見識橋本環奈嘅顏藝！