馬刺今日主場面對衝冕冠軍嘅勇士，喺對方沒有DeMarcus Cousins，再加上球隊成功博得更多罰球嘅情況下，馬刺成功以111：105擊敗勇士，今季戰績亦改寫成42勝29負，西岸排名一舉超過爵士及雷霆上升至第5位！

今場獲勝後，馬刺今季戰績達到42勝29負，亦即係代表球隊再一次收下勝率超過50%嘅賽季。自從Gregg Popovich在1996-97球季擔任起馬刺教練後，馬刺由1997-98球季開始黎到今季，已經連續22個球季取得超過50％嘅勝率。

另外有一組數據亦都說明馬刺喺Popovich執教下，戰績究竟有幾誇張！原來自從1997-98球季至到今天，馬刺勝率低於50%嘅時間竟然就只有65日，排名全聯盟第一，而排名第二嘅則係火箭，但天數竟然達到1007日，足足係馬刺嘅15倍有多！

另外，排名第三至五位嘅則係獨行俠(1027日)、拓荒者(1044日)及爵士(1101日)，而更令人對Popovich敬畏嘅係，由1997年到今日，排名二至五位嘅球隊一共換左19名唔同嘅教練，而Popovich則由1996年執教至今仍然回若金湯。

昔日，Popovich及馬刺憑住Tim Duncan呢位狀元圪立不倒20年，期間五奪NBA總冠軍。但今季除左Duncan之外，連Manu Ginobili及Tony Parker都已經不在陣中，再加上有主力Kawhi Leonard離隊，部份重要輪換角色球員又受傷，馬刺今季陣容可以話天殘地缺。不過只要一日有Popovich在，球隊戰績就必定有保證。今日超過雷霆，常規賽完結前難保佢地唔會超過拓荒者，甚至火箭升至西岸第三位！