每部遊戲主機，喺推出之後，一定會有人推算將會推出強化版或者簡化版，所以出開簡化版嘅老任，一直被大眾傳言會開發一部簡化/輕化版嘅Switch。日前，官正式發佈喺九月將會推出Nitendo Switch Lite，將原本畀人覺得係手提機遊戲機多過電視遊戲主機嘅Switch 直接推向手提遊戲機嘅市場，可能睇到PSV 同自家N3DS 都「壽終正寢」，所以食正哩個份額。唯獨係...居然唔支持TV Mode，老任你搞什麼？忘記了PSV同PSV TV 點解「壽終正寢」？

主機先會以彩色示人，推出唔似Switch 咁，只得黑色主機(唔計特別版)，換色都只係換Joy-Con 咁大把。Colorful 向更易取悅女性同兒童向嘅玩家。相信一如以往Gameboy Color、NDSL 咁，出到色彩繽紛，唔知會唔會推出某國最愛嘅土豪金呢？

整體細部咗，輕身咗，芒亦縮到得返iPhone Plus 型號嘅5.5吋，但電嘅持續時間就加多半個鐘，由原本2.5~6.5個鐘，加到3~7小時個鐘。重點係價錢減去3分1，計返千幾蚊港紙，真係想吸返N3DS 嘅客戶。

由於Switch Lite 主機已連住Joy-Con(或者已變成主機一部份)，所以一啲需要拆Joy-Con 玩嘅遊戲(即係唔支援手提mode)，一定要額外配返一套Joy-Con 先玩得。

只要有支緩手提mode 嘅遊戲，就絕對無問題，而無嘅話，可能嘅操作同遊玩時有出現不便感。相信大熱遊戲應該會更新，而好多 game 設計已經預有良好手提mode 玩，所以哩樣反而唔需要太擔心。反而最擔心係，居然唔支援TV Mode。你要知道，一直你都在否定Switch 係手提遊戲機，肯肯定話Switch 係電視遊戲機，依家你咁割蓆法，都幾打倒昨天的我。

不過小熊留意到Switch Lite 嘅設計背底同Switch 一樣，都有插Docking 嘅一個凹位，相信TV Mode 嘅問題，可以日後透過更新做到，唔好嘥費咗哩個咁好嘅兩邊走優點。如果只係設計嚟用Docking 充電，咁我就......玩返Switch 算了。

Nitendo Switch Lite

推出日期：2019年9月20日
售價：19,980円(未連稅)
主機平台：手提Mode、Table Mode
顏色：蘋果藍、香蕉黃、灰黑色
屏幕Size：5.5英寸
屏幕解像度：1280 x 720像素
Size：長91.1mm×寬208mm× 厚13.9mm
重量：～275克