作為新鮮出爐嘅總冠軍成員兼FMVP，Kawhi Leonard絕對係現役最出色嘅球員之一。不過，即使強如Kawhi其實都有天敵的，佢就係中鋒Zaza Pachulia。而為左阻止與Paul George喺快艇組隊嘅Kawhi，勇士再次搵黎Zaza，睇怕西岸會再有一場腥風血雨...

大家仲記得兩年前嘅季後賽西岸決賽馬刺vs勇士嘅第一場，本來馬刺喺Kawhi嘅帶領下表現出色，並大幅領先，但Zaza一次攝腳令Kawhi受傷，並被迫退下火線。失去Kawhi後，馬刺隨即崩潰，最終被勇士4:0橫掃出局。其後亦引發出Kawhi離隊，並在上季助速龍奪冠，以及後來加盟快艇令NBA局勢大變。

而唔知係咪為左阻止Kawhi嘅快艇，勇士今日宣佈Zaza正式回歸球隊，不過今次唔係做球員，而係擔任球隊顧問。據消息指，上季效力活塞嘅Zaza已經宣佈退役，而回歸勇士出任顧問，其工作將包括喺運營部門及籃球部門工作。

唔知勇士會唔會安排Zaza指導勇士嘅球員，點樣先可以有效限制Kawhi嘅表現呢？