上週講過幾大重點電影都延期上映，近來可能確實唔係睇電影最好的時間，咁如果一部好的作品真係呢個時間上畫又點呢？咁就自然會變成無奈砲灰，上週迪士尼Pixar全新親情魔幻作《½的魔法》係美國上畫以4000萬美元的票房成為票房冠軍，但就成為彼思動畫製作室（Pixar）有史以來票房最差的作品。《½的魔法》贏口碑賺點數，但收錢條數唔掂，呢期電影業界真係要頂住，其實逆境掙扎求存嘅又豈止電影業一行。 《1/2的魔法》（Onward）係香港就已經宣佈左延期，可能最快都要暑假先有個睇(如果香港學生今年有暑假的話。)題外話，呢套野當中有一句獨角馬女警「出櫃」對白搞到比俄羅斯刪剪同中東國家禁播，迪士尼開始套套戲都加入同性戀平權元素，有人話唔好講咁多政治，其實政治堅時刻在身旁，包括你話唔好講政治已經好很「政治」(點解電影全部延期都係政治影響)。

《1/2的魔法》其實成績已經算唔錯，話哂都叫票房第一，加上口碑又好，感動引淚，可惜出身於強大的彼思動畫製作室（Pixar），Pixar 電影作部部都非同小可，下下都億億聲，睇返老大哥自1995年的《反斗奇兵》以來，Pixar 電影係全球票房收入已超過140億美元。作為（Pixar）出品《1/2的魔法》係Rotten Tomatoes上獲得86％的高分影評，加上強大的配音陣容，點解票房相對低收？相信好大可能同美國排錯檔期有關，3月呢段時間並非假期，如果想合家歡做學生同小朋友生意又難，加上的確撞正美國開始有武漢肺炎的流入疫情的困擾，《1/2的魔法》係美國如期上映迪士尼硬食相信已經係盡左力，好多其他大作我地上週都講過都要延期唔敢頂硬上硬蝕。

《1/2的魔法》暫時全球已有6800萬美元收入，加上大多數國家都未上畫，其實都未必真係史上最低收，可能後勁凌厲呢？呢套戲仲有兩個討論點，第一就有少少劇透左，係美國《1/2的魔法》播映前的短片居然唔係自家Pixar短篇動畫，而係第一次播映Simpsons短片，點解？因為迪斯尼收購左成為20世紀電影製片廠（原20世紀Fox）後統合埋一齊。都幾有趣的組合，唔知阿森一族有無機加入Marvel世界。第二個就是女同性戀的議題，《1/2的魔法》中有個女警「出櫃」對白，欣然同人講自己性向同有個女朋友，其實好小事，但就因此被好多保守國家禁映，而睇到迪士尼好有意將呢個意識形態推廣加入電影當中。反思下當你鬧中國電影好多不必要的意識形態同政治意念，其實美國電影都有好多「有添加」 嘅政治意識形態，當然，睇下你想點樣的世界，我就情願見到女女咀咀好過戰狼咱們回家去！