武漢肺炎影響全球，唔單止大家喺香港冇酒飲、冇戲睇、冇飯食，就連喺屋企嘅娛樂都大受限制，劇集、遊戲、AV都相繼因應疫情而延期發售又或停拍，最新就搞到大家連漫畫都冇得睇啦！

出版著名漫畫週刊《少年JUMP》等雜誌嘅集英社於4月7日發表嘅官方公告，指一名任職於編輯部（但唔知係邊本書嘅編輯部）、40歲左右嘅職員自3月26日就開始發燒，到4月6日傍晚正式確診武漢肺炎，集英社已即時為整棟辦公室進行消毒，編輯部亦改為Home Office。但到第二日 (4月8日) ，《少年JUMP》就發公告指，其編輯部內有一名社員出現病徵，已送往醫院等候檢測結果。雖然《少年JUMP》強調該名社員並無與其他漫畫家接觸，但由於要Home Office嘅關係，原定4月20日出版嘅「21號」《少年JUMP》將要延期，4月27日會改出「21．22號」，至於原定4月13日出嘅「20號」將會如期推出。

換言之，大家下下個星期就會冇得睇《少年JUMP》上連載嘅作品，如《海賊王》、《鬼滅之刃》、《排球少年》、《Dr.Stone新石紀》、《約定的夢幻島》、《我的英雄學院》等，在家嘅娛樂又少一樣啦。