要不是武肺，相信依家已經有唔少人Plan緊暑假去日本旅行，當中更加應該有好一部份人係諗住殺入大阪環球影城 (USJ) 嘅新園區「Super Nintendo World」，依家呢…就真係得個Plan字啦！不過，一心去搶先看嘅讀者又唔使太傷心，因為USJ今日都宣佈「Super Nindento World」會延期開放。

任天堂於1月公佈嘅Super Nintendo World宣傳片

據NHK報導，原定7月下旬開放，投資600億Yen嘅Super Nintendo World雖然已經大致完工，但因為防止新園區吸引大量遊客入場，入場又堆哂去新園區，造成新一輪傳染，所以就算起好都唔會開住。特別值得一提嘅USJ方面並無講明延期到幾時開放，所以目前大家都係得個等字。

目前USJ已經重開，但就受到唔少限制，除咗人數限制及唔畀大叫之外，亦只容許關西地方，即係大阪、京都、兵庫、滋賀、奈良、和歌山等地嘅居民先可以入場，換言之唔好講境都入唔到嘅外國遊客，連日本人都唔係個個入得場。相信今次延期除咗為公眾健康著想，亦係因為USJ希望於市面回復正常後先開放新區，用盡新園區吸引力吸引遊客入場。

從早前日本網民拍攝的照片可見，園內大部建築已接近完成